RUNDU – Wokusika komurongo varugani wondango zodoropa zaRundu, muna hamene mukwatelimo kurona pamberewa Sam Nekaro, kuna kara ngesi mevango lyokulikarera pwavene kutunda tupu moutano una puko. Munambudi ogu kahuyungire kumwe naSam Nekaro nkera, ogu kayinkondopere asi wokusika komurongo varugani wondango zodoropa ngesi kuna kara mevango lyavelike kwato kuvatarerapo vantu peke. “Ame kanikere namukwetu mosondaha ogu kawizire kembo lyange kumwe namukwawo vatunde koVenduka ogu vana gwana ngesi asi ana kara nokambumburu koCoved-19,’’ yimo ana kutanta Nekaro.
Mukurona kwatelimo ogu pamberewa katente asi mukwawo zendi ogu kawizire nomugara vatunde koVenduka momapeu makura awo mosondaha yipo nye kavawizire pembo lyange. Nekaro katente asi mokukwama nye ekeverero lyewa, age yipo nye katokwere kukakara pevango lyagelike omu ana kundindira Muholi zendi ogu kavakonakonene ana kundindira yitundwamo. ‘’ Nsene asi yitundwamo yendi nayikawiza asi ana kara nokambumburu aka, name nahepa kuza komakonakono, yimo ana kutanta Nekaro. Nekaro katente hena asi wokusika komuyu varugani wondango koruha rwegendeso nawo kuna karakevango lyavene. Vamwe varugani ava kava kere pevango limwe nomugara ogo katundire koVenduka ogu kayakere nage posilika momapeu. Mokukwama mwendi, mugara ogo kagendere nomukadi ogu kayapere mararo murugani gwetu gumwe arugana nage kondango. Age kagwedereko asi evango lina lyondango zovakansela nalinye ngesi kavalipomberere mutji. Simpe varugani wondango mukunda Kavango zoupumezuva navenye kuna vahundire varuganene komambo gawo. Mugavi nombudi koruha rovakansela womukunda, Fransiska Thikerete katanterere Nampa asi awo kuna kara nomatangayi morwa kutunda tupu apa gwawiza mukisi ogu awo kukara novagenda wovanzi vantu vanzi ava ruganesa evango lyawo lyemunzugo lyoyigongi makura evango eli kapi valipombera mutji nampili nakauke. ‘’Ose katutere asi ngapi mberewa zetu ezi omu azikara novantu wovanzi omu konyara nkenye yigongi kuyakara pevango eli ntani noministeli dononzi kuyakara nomapongo pevango lyetu eli. Yimo ngoso ana kutanta Thikerete. Age katente asi evango eli ava pongere vakansela, evmunzugo lyoyigongi, emunzugo lyepangero lyoyigongi nonomberewa nadinye tavadipombere mutji yipo asi walye navasesupikako mukaro gokukagura mukisi ogu goCorona virus. Nampa