OKANDJENGEDI – Omulumenhu weedula 32 okwa kwatwa po eshi vati a denga omukainhu waye nomwiya shaashi ina hala okuya naye moixulo. 

Oshiningwanima osha ningwa momafiku 11 omwedi ou kolukanda Okandjengedi moshitukulwa shaShana efimbo loufiku. 

Omukulunhu koshikondo shokukonakona oimbuluma mOshana, Deputy Commissioner Fredrick Ndjadila okwa hokolola ta ti omufekelwa okwa ya konduda yomukainhu waye ou e li nakuninga oshihakanwa ndele ta pula va ye naye moixulo. 

Opolifi oya hokolola tai ti omukainhu ou weedula 27 okwa dimina a ye moixulo nomufekelwa. 

Okudja opo omulumenhu ou okwa ya pondje ndele ta ka tula otuwa yaye ponhele pe li nawa molwaashi kakwa li e i tula ponhele pawa. 

Opolifi oya koleka tai ti omufekelwa okwa aluka ndele natango ta pula opo va ye moixulo lwoshikando oshitivali nomukainhu waye ashike okwe shi anya. 

Otaku hokololwa kutya omufekelwa okwa kufa omwiya ndele ta denge omukainhu waye shaashi ina hala okuya moixulo naye lwoshikando oshitivali. 

Opolifi oya ti omufekelwa okwe mu nukila ndele vati ta i naye momilele inashi dja kehalo laye. 

Omukainhu vati okwe shi pondola okufaduka po e lih amunghele ta kwena osho sha eta ovashiinda va penduke. 

Ova lopotela opolifi fiyo ta kwatwa po. 

Omufekelwa ota holoka nena momhangu yamengestalata waShakati. 

-fhamalwa@nepc.com.na