Omukainhu weedula 23 okwa tambulilwa moshipangelo shaUtapi ta mono epango konima eshi vati a mwa ojika nelalakano lokukufa mo eteelelo.
Oshiningwanima osha ningilwa mOutapi Etivali.
Omukainhu ou okwa dile komukunda Olupito moshikandjohoololo shaKalongo.
Omupopiliko wopolifi moshitukulwa shaMusati Inspekta Anna Kunga okwa hokolola ta ti omukainhu ou oku li moshipangelo, e li metonatelo lovapolifi, nota ka holoka momhangu ngeenge a lekelwa mo moshipangelo.
Kunga ta ti omukainhu ou oku li monghalo i li xwepo.
Otaku hokololwa omufekelwa ou e lituwa kumushiinda shaye e li moshipyu shouyehame womedimo. Konima okwa twalwa koshipangelo oko a ka dimbululwa kutya okwe likufa eteelelo.
Inspekta Kunga okwa ti okukufa mo eteelelo osha nyika oshiponga molwaashi ohashi eta omunhu a xulife.
Okwa weda po ta ti okukufa mo eteelelo oshimbuluma shakula.
“Oshiwana nashi lopotele opolifi kombinga yovakainhu tava kufa mo omateelelo,” ta ti.
Okwa kumaida ovakainhu ovo ve lihumbata opo va ka konge omakwafo koipangele ngeenge tava hepekwa koupyakadi wopamadilaadilo.
“Okukufamo eteelelo kaku shi ekandulepo lomukundu,” ta ti. -fhamalwa@nepc.com.na