Auleria Wakudumo 

Opolifi yaMuntele moshitukulwa shaShikoto oya tula ovalumenhu vavali moipandeko eshi vati va nyeka omukulupe weedula 81 opendjela yaye yeemwedi mbali. 

Oshiningwanima eshi osha ningilwa momukunda Onakagala, sha ningwa Etitano lwopo 19h00 yokomatango lwaapo. 

Opolifi moshitukulwa shaShikoto oya koleka oshiningwanima eshi. 

Otaku hokololwa omukulupe a kwata opendjela Etitano ndele ta ka pita pounduda vopomukunda. Okudja pounduda a shune ngeno keumbo, ovafekelwa vavali vati ove mu ponokela okudja konima ndele tave mu nyeke oshimaliwa shi fike poN$2 500. 

Omukulupe okwa nyekwa vati opendjela yaSeptemba naKotoba. Ovakulupe otaku hokololwa va kwatela kumwe eemwedi mbali nova kwata N$3 200 molwelunduluko eshi tava tembuka okudja kEpupa va uka koNampost. Elunduluko eli otali ka hovela okudja mu1 Kotoba neudo. 

Opolifi oya pondola okutula ovafekelwa aveshe moipandeko. Ovafekelwa ove na eedula 24 oshoyo 26. 

-wakudumoauleria@gmail.com