Auleria Wakudumo
Ovalumenhu veedula 48 no55 ova tulwa moipandeko molwaashi va hangika nomamanya e li 204 oo taa feekelwa a fa okawe inaka kweywa.
Oshiningwanima osha ningilwa peengaba daAriamsvlei, sha ningwa Olomakaya lwopo 19h00.
Omupopiliko wopolifi, Deputy Commssioner Kauna Shikwambi okwa koleka oshiningwanima eshi.
Otaku hokololwa ovalumenhu ava vavali va kwatelwa peengaba daAriamsvlei, va hangika tava di koSouth Africa va uka moNamibia.
“Ova tulwa moipandeko konima eshi opolifi ya hada eendongelwa davo ndele tai hange mo omamanya 204 taa fekelwa a fa okawe,” Shikwambi ta ti.
Shikwambi okwa holola kutya ongushu yomamanya taa feekelwa afa okawe inai shivika natango.
Oshiningwanima shikwao, opolifi oya tula moipandeko omufekelwa weedula inadi shivika eshi a hanauna po omaliko epangelo poshitaasi shopolifi yaTjomuise moWindhoek.
Eshi osha ningwa Olomakaya lwopo 15h00 poshitaasi shopolifi mOtjomuise.
Opolifi oya holola kutya omufekelwa okwa hanauna po omivelo mbali dopodolongo (omuvelo woshitenda naukwao umwe), nokashina kokuhada ovanhu.
Opolifi oya holola yo kutya omufekelwa okwa hanauna po omaliko aa ina shindwa nande okulye.
Ongushu yomaliko a hanauanwa po inai shivika natango.