Uuministeli welongo owa gandja ompito kaanyasha 64 moshitopolwa shaMusati, mboka ye li metifa okudheulilwa uunangeshefa okupitila moplogalama tayi ithanwa Namibia Youth Credit Scheme (NYCS). Omadheulo ngoka oga tameka momaksiku gahetatu notaga ka hula momasiku 15 gaDesemba nuumvo.
Uuministeli okupitila momushangwa gwa pitithwa owa ti otawu gandja omadhewulo ngoka okuhumitha komeho oontseyo dhaanyasha dhomangeshefelo.
“Okupitila moplogalama ndjika yo- NYCS, aanyasha otaya kala ye na ontseyo nkene ye na okulonga noongeshefa dhawo oku dhi humitha komeho, oku dhi kaleka po osho wo nkene ye na okuya po noompito dhimwe tadhi tula oongeshefa dhawo poonkatu dhimwe dhi ili,” ya shanga ngaaka.
Tau ti, oplogalama ndjoka oya nuninwa ashike aanyasha opo ya vule wo okukoka, pamukalo gomangeshefelo yo ya vule wo okukokeka eliko lyoshilongo, shoka tashi humitha komeho oshilongo shika.
Ya shanga kutya oplogalama ndjoka otayi tsikile okuyakula aanyasha nelalakano lyokuhwepopaleka oonkalo dhawo.
Nonando kwa ndhindhilikwa kutya aantu ye vule po2 000 moNamibia aanangeshefa haya yambidhidha iiyemo yoshilongo noopelesenda 30, natango oya kumagindhwa ya tsikile okuya po noongeshefa oonshona nodhopokati.
uuministeli wiikwafambilika konooli sho kwa li wa gandja omalongo nokufatulula kombinga yesimano lyoongeshefa moshitopolwa shaMusati, okwa li wo wa kumagidha oshigwana kutya osha pumbwa okuya po noongeshefa opo eliko lyoshilongo lyi koke opo wo iilonga tayi indjipala moshilongo.
Ya ti, okupitila momikalo ndhoka ondjala noluhepo otalu kandulwa po.
Silas Shikoyeni ngoka e na ehalo okuya po nongeshefa okwa ti, uudhigu oshimaliwa shokutameka ongeshefa.
“Uunongo otu wu na tse aanyasha, omadhiladhilo goongeshefa otu ga na, ashike oshimaliwa uupyakadhi.
Epangelo olya pumbwa okuyambidhidha aantu noshimaliwa, unene mokati kaanyasha opo ya vule okuya po noongeshefa,” ta po pi ngaaka. Ta gwedha po wo kutya ope na ooplogalama ndhoka hadhi gandjwa, ihe ohadhi gandjwa koohandimwe nohadhi gandjwa nuudhigu.
-vkaapanda@nepc.com.na