Kanghudi- presidente gwanare Hifikepunye Pohamba kahundilire vaNamibia asi vaguse nonkondo dopaumwene yipo vazangure nondja dina gwanene. Age katente asi udigu ou wonzara noruhepo tautwikire nsene asi kapi tatutarere mavango goyikunino gahageke kurugana, uwa nye asi twahepa kugawapukurura.
Pohamba kahuyungire nonkango edi posiruwo oso nompitisili domukunds Ohangwena kavazire vakamudingure sigendo oso kapitisilire nguuru gomukunda Ohangwena Kadiva Hamutumwa. Presidente gwanare katente asi mavango aga kuvhura gapire kukarugana hena, unene mavango nye aga vayatoterepo uye wapresidente gokuhova mosirongo Dr. Sam Nujoma, apa yakere kwakere asi kuvhura kuvatera uzuni naunye nye ngesi hawe kapi yina kurugana. ‘’ Omu muna hamene Etunda green scheme, Shadikongoro Irrigation project, Musese Green scheme ntani Uvhungu- Vungu Dairy Project, mavango nagenye aga kwagwene yimaliwa nomiliyuna nonomiliyuna nye ngesi gana pata. ‘’ Ame pwanyamwange kuna kugazara kukadingura yikunino eyi moKavango zoutokero nezi zoupumezuva nikavapure asi yinke yahoroka konoprojeka edi.’’
Age kuna kumoneka asi gumwe nage ana pilire kuyihafera. Pohamba katente asi kuwapukurura noprojeka dangesi, ose ngano vaNamibia natuhoroka mukaro gokuninka asi nondja kutunda ponze zosirongo yipo tuya kara nonondja. Age kahundilire nompitiusili moOhangwena asi nawo vahepa kutulisapo evango lyawo lyoyikunino,’’ Pohamba yimo ngoso ana kutanta. Eyi yokukara asi kundindira tupu kovantu peke kapi yina kumoneka nawa age kumwe nye nokuhundira Nguuru asi gahepa kugwanako evango moOhangwena eli nalizangura nondja. Age kagwedereko asi gahepa kugwana epya eli nazangura mahangu nayimwe ngoso omu navayikuna. Yitundwamo yokuhamena nondja kayilikidire asi vaNamibia wokusika ko 1.6 miliyuna kuna kara asi 53% vatungimo kapi vana kuvhura kuzangura nondja davene. Ntani kuna kumoneka asi sinzi sovantu kuna kara noudigu wonondja awo ngesi kuna kuparuka tupu kondja dorukukutu aligava epangero. Awo kuna kuhuyunga asi twahepa kuzangura nondja danyamwetu ntani twahepa kurwanesa umbondo omu nye natukamona asi muhoko kwakulirera pwagwene. Hamutumwa katanterere Presidente gwanare asi Ohangwena kuna liwapayikire kuhamena nondja. ‘’ Ose tuna hara kutura asi kwato epata nalirara nonzara morwa asi nondja kwato,’’ yimo katente. Age katente asi nonzogera nare dina tameke omu vana kuliyonga nowo vakarako asi mavango gokuhanzera vahepa kugaruganesa unene gakara moOhangwena gakare nye nofarama. ‘’ Nzodi zawo kuna kara asi kapisi vazangure tupu moOhangwena nye vahepa kukara noyiwizamo yina gwanene. Mezuva lyoolyo, Pohamba kageve ruguwo rwendi kuhamena omu yimaliwa yepangero vana kuyivaka moumbondo wakahurako omu yimaliwa oyo ngano vayiruganesa yivatere muhoko gwaNamibia. Age katumbwire Fishrot, omu yimaliwa eyi vayilipa momukaro dona, udigu waNamcor, omu yimaliwa vayiruganesa mepuko ntani umbondo omu veranda maholi aga; ntani Namdia.
Pohamba katente asi edi yido nye nomilyuna dahepa kuyavatera vantu vetu, kuwapukurura mavango gonondima, omu nye ngano twakutara asi nkenye muNamibia agwane yina gwanene. Age katente asi mokulituramo unene turuganene nondja, tuvhukisa muzangu gwetu gondja, egano lyangesi ngano naligusapo nzaara ntani uvera wonzara, omu ngano nayirugana koukanguki ntani tukare nye muhoko guna kara newogo.
–Vkaapanda@nepc.com.na