ONESI – Omukulunhu wopolifi koshitukulwa shaMusati Commissioner Ismael Basson okwa ti ovadali tava holoke ovafekelwa ngeenge va kwata ounona onghonga otava ka pewa ehandukilo lopaveta.
“Xulifei po okuholeka ouyelele ngeenge ounona tave mu lombwele kutya ova longelwa omunyonena wopaixulo,” ta ti.
Edi Basson okwe di popya Etitano pefimbo kwa li a ninga omutumba nelelo lopamufyuululwakalo laUukolonkadhi kOnesi moshitukulwa shaMusati.
Omalenga noovene vomikunda melelo laUukolonkadhi okwa li a fika okutopolelafana omayele kokukundafana nghene oimbuluma tai kandekwa koshikandjohoololo shavo.
Basson okwa li pamwe novanambelewa vopolifi okudja koikondo ya yooloka omo ve lipyakidila nokutalela po omalelo opamifyuululwakalo a yooloka mOmusati.
Okwa ti elalakano opo omalelo opamifyuululwakalo a kale e na oukumwe nekwatafano liwa okukondjifa oimbuluma.
Pefimbo lomutumba ovaleli vopamifyuululwakalo okwa li va mona omhito yokupula omapula nokuyandja omanyenyeto avo kombinga yomayakulo opolifi.
Basson okwa popya ta ti opolifi oya didilika ovadali vamwe ngeenge va lombwelwa kutya okaana oka kwatwa onghonga ohava mwene ndele tava holeke ouyelele.
Okwa weda po ta ti naashi ohashi eta opo okaana ka kwatwe onghonga lwoikando ya yooloka molwaashi omudali ina ninga po sha eshi a lombwelwa.
“Kaleni alushe tamu shivifile opolifi pefimbo ngeenge mwa lombwelwa kovaneumbo veni va kwatwa onghonga. Oimbuluma yomaludi a yooloka nai lopotwe pefimbo,” Basson a popya.
Basson okwa popya ta ti oshikandjohoololo shaNesi osho shimwe sha didilikwa kwa lopotwa oibofa yomakwatonghonga ihapu.
Oshivike dja ko omulumenhu weedula 45 okwa kwatwa po koshikandjohoololo shaNesi molwaashi a kwata oundenge woukadona vavali onghonga meumbo lavo pefimbo kwa li va kofa.
Oonakuninga oihakanwa umwe oku na omido 14 omanga umwe oku na omido 16.
Pefimbo ve li komukunda, oovene vomikunda ova lombwela Basson tava ti ova taalela eshongo linene ngeenge tava dengele opolifi eshi hava lombwelwa kutya kape na otuwa.
Basson okwa nyamukula ta ti onghalo yokuhe na eetuwa koitaashi itashi ti kutya ovapolifi inava pumbwa okufika ponhele ya longwa oshimbulu.
“Inandi hala okuuda vali enyenyeto tali di moshiwana inashi kwafelwa molwaashi pehe na otuwa. Ovakulunhu koitaashi yopolifi nava kwashipaleke kutya opolifi otai fiki ko ngeipi koshiwana,” ta ti.