Auleria Wakudumo
Kansela woshikandjohoololo Engela moshitukulwa shaHangwena Elikan Hainghumbi okwa yandja ekwafo kovakwanedimo vomukulukadi nokaana kaye ava va xulifa eshi va wila metale momafiku 02 Febuluali 2025.
Hainghumbi okwa yandja ofaila yomudile, omakutu avali eekilograma 20 oufila wepungu neekilograma 20 dolwishi okudja moshikefa shepangelo.
“Otwa yandja ngaho apa hatu dulu shaashi etumwalaka inali fika diva kombelewa. Ngeno otwa li twa shivifilwa diva, ngeno otwa konga omakwafo e dule pwaao twa yandja,” Hainghumbi ta ti.
Hainghumbi okwa indila oshiwana opo shi lopote oinima ya fimana ngaashi ovakwanedimo va kanifa ovaholike vavo mefyo loipundjamene ndele ove li momhumbwe kombelewa yaye meendelelo opo ve lilongekide diva.
Oonakufya, Ottilie Shafokutya weedula 31 nomonakadona Justina Robert weedula 13 ova xulifila komukunda Onangubu moshikandjoholo Endola ashike eenghali oda twalwa keumbo lavo komukunda Omaadi moshikandjohololo shaNgela.
Meenghundafana naKundana, ovakwanedimo ova holola kutya ova pula ekwafo kovasamaria ovanamutimanghenda opo ve va kwafe okupaka ovaholike vavo vavali.
Ngoloneya woshitukulwa shaHangwena Sebastian Ndeitunga naye okwa holola kutya okwa ya mekwatafano nakansela wEngela opo va mone kutya otava kufa mo shike moshikefa shepangelo okukwafa ovakwanedimo ve li momhumbwe.
Okwa li nda tuma ko omunashipundi welelo loshitukulwa shaHangwena Erickson Ndawanifa opo va ye mekwatafano novakwapata, va wede po pomakwafo a yandjwa kukansela wEngela.
Shafokutya nomona ova pakwa Olomakaya momukunda Omaadi.