OSHIKUNDE – Ngoloneya mukulu woshitukulwa shaHangwena Usko Nghaamwa okwa kumaida ovadali novahongifikola opo va xulife po onghalo youkwamuhoko meefikola shaashi otai teya po ombili. 

Edi Nghaamwa okwe di popya pefimbo kwa li ta yandje omapapa keefikola noikwafifohongo kofikola Oshikunde Combined School oshivike sha dja ko, koshitukulwa shaHangwena. 

Okwa ti ovahongifikola ovo hava longo ofikola kondje yoitukulwa yavo ohava mono oixuna molwaashi hava popi omalaka a yooloka. 

“Oto hange omudali ta ti ke hole omuhongifikola wonhumba shaashi ina dja moshitukulwa shavo. Nashi ninge exulilo okukala tamu ningile ovahongifikola okatongo,” a lombwele ovadali. 

Okwa weda po ta ti novakulunhufikola nava kale ve na oukumwe nokukaleka po ombili nelandufano pehe na omunhu ta ningilwa okatongo. Okwa ti Namibia oshilongo sha manguluka noshi na oukumwe nombili. “Omunhu keshe okwa manguluka oku ka longela koshitukulwa shehoololo laye,” ta ti. Okwa weda po ta ti omuhongifikola okwe lihongela ounongo wokulonga ounona ve li koitukulwa ya yooloka,” ta ti. 

“Otu na ovahongifikola vamwe hava longo peefikola di li kondje yoitukulwa yavo ashike ohava pitifa nawa ovanafikola molwaashi otava longo ve na elalakano lokupitifa ounona,” ta ti. 

Nghaamwa okwa yandja oshihopaenenwa ta ti pefimbo a li ngoloneya okwa li pe na omupangi umwe ta longele kokapangelo kOlukula ashike okwa li ta mono oixuna. 

“Kakwa li e holike kovanhu va dja pomudingonoko opo. Okwa haulwa kutya na shune koshitukulwa shavo,” ta ti. 

-fhamalwa@nepc.com.na