Limembala liketalizoho zewela mwakatengo ka Kavango Zambezi Transfrontier Conservation Area (KAZA FCA), lihatelezi kuli lika zwelapili kubabalela limbule ili kuli masika akwapili ato lifumana. Makwambuyu bababona zabupoti kuzwelela linaha liketalizoho, ili Botswana, Namibia, Zambia, Zimbabwe, ni Angola, neba bulezi zeo kanako yamukopano wabu 13 wamakwambuyu, one ubile teñi mwa Katima Mulilo cwanuñu. “Kutisa cwale lusweli kubeleka katata kucafanza litaba zabupoti, kuizibaha, kubabaza nikubona kuli katengo ka KAZA kahula,” nekubaleha sitatimende sa makopanelo sa makwambuyu.
Katengo kamakwambuyu ne kaitamile kuzwelapili kubeleka katata, kubona kuli kalemuha nikuzwisezapa liswanelo zasicaba mwalinaha zewela mwakatengo. Mwamanzwi ahae likwambuyu wasilalanda Pohamba Shifeta nakupile limembala zakatengo kusupeza kamaiso sakata mwalitaba kaufela zakatengo ka KAZA.
“Luswanela kufa kelezo mwapupo yamilao ni mwalitaba kaufela zeama kuhulu kwa KAZA, kukala kakuikambota kubabana nikabelo, litaba zalipisinis, kuhula kwabupoti ni zeñwi cwalo zeswanela,” nekubulezi Shifeta.
Mwamukopano oswana naha Namibia netambekile ketelelo ya katengo ka KAZA TFCA kwanaha Zambia. Mwamanzwi ahae likwambuyu wabupoti wanaha Zambia Rodney Sikumba nalumbile naha Namibia, kaketelelo sakata mwalilimo zepeli zefelile, nihane kuna ni butata bwa Covid-19, mi naitamile kufa ketelelo yeswana. “Naha Zambia hainga ketelelo, nibata kumisepisa makwambuyu kana, kuli lukazwisezapata ketelelo yende nikubona kuli katengo ka KAZA kazwelapili kutahisa miselo yeminde,” nekubulezi Sikumba.