David Adetona

Sîsenǁareb ǁnâuguxoaǁguiba kha ge nē ǀgam ǀkharikha, ǀKhomas Namibiab dis tsî Cunenes Angolab dis hâra sao ra omkhâisens !âgu ǂnamipe ge xoa!gao, ǂgaiǀons ai !hū-omkhâis tsî !hanaǂgāb, ǂurusib, ǁgau!nâs tsî !gâi ǂâuhâ tsî ǂgaoǀkhāsa !harib ai hâ ǂkhari-omna !hūǁîn nē !hūkha dina mās ǂnamipe. 

ǀGûǁ-ae ge nē ǀkharikha ǁaegu a hâ ǁnâuguxoaǁguib ge ǀKhomas ǀkharisi mûǂamaos, Laura McLeod-Katjiruas tsî ǁîs gurisas Angolab di Cunene ǀkhariba ra mûǂams, Gerdine Didalelwas hâra xa ge ǀhûǀgui xoa!gaohe. 

Nē xoa!gaos ai!ân ge ǂgaeǂgui-aora tsî ǁîra ǂnûǁkhaeba-aon tsîna saride Independence Memorial Museums hîa dana!ās ǀAeǁgams !nâ mâs, Ongos Valley Projeks hîa ǀAeǁgams di Havana ǁanǁguib !nâ ǁgoes, Universitaits Namibiab dis di ǀAe!khōs ǁkhāǁkhākhâidi kampes hîa Hage Geingob Kapes ti ǀgui a ǂansas, Havanas ǀGapi Skoli hîa Havana ǁanǁguib !nâ mâb, ǀKhomas ǀKharisi ǀAwemā!nans di !garo!ā ǂgari-aob, ǂkhari-omn tsî ǁgam-e !hūǁîna īǁkhā kaibas !aroma hâ projekdi, Katuturas ǂUrusib Senters tsî ǀnî !kharagagu ǁanǁguigu ǁga ge ūhâ i. 

ǀGapi ǂaidani-aon hoa ǀgam !hūkha xu ge hâ in, aiǁgause ǂgiǂgosi ǀawemā-aon, direktern !kharaga !âgu berode ra mûǂamn, administarasis !ereamde !kharaga berodi !nâ tanihâ mâisan tsî noxopa ǀnîn ge nē ǀō-aisa ǁnâuguxoaǁguib ǁâudība ǀAeǁgams !nâ ge ǁhao!nâ hâ i. 

McLeod-Katjiruas tsî Didalelwas hâra ge !nae!khaixa!nâ ǁnâuguxoaǁguiba nē ǁhao-aon ai!â ge xoa!gao. 

Nē xoa!gaos di ǁgūbas ge hoan !gâ-ai, ǁawoǁawos ǁnāti ī khoexa!nâ sîsenǁareba nē ǀgam ǀkharikha !nâ ǂnuwi tsî !gâi sîsenǁareb tsî ǀomkhâisa hoa ǀkhākha xu taniǀgara tsî ǁanǂgāsaben di tsēkorobe ûiga !gâi!gâi!nâ tsîuǁkhāsiba nēs !nâ-ū ǀomkhâi kais ai hâ.