O’Linn osho a pakwa …konima yeemwedi nhano 

O’Linn osho a pakwa …konima yeemwedi nhano 

OHALUSHU- Ovanafikola kosekundofikola Etosha Secondary School ova  yandja efimaneko lavo la xuninwa komunafikola mukwao O’Linn Vanyenga Nauyoma ou a xulifa eshi a wila moGuinas Lake omudo wa djako.

Nauyoma oo a li e na omido 16 okwa fudikwa Olomakaya komukunda wavo Ohalushu moshitukulwa shaHangwena.

Omunafikola ou okwa xulifa momafiku 8 Sepeteba  omudo wa djako eshi a wila metale laGuinas pefimbo kwa li eli novanafikola vakwao, ashike olutu laye kala li la monika. 

Ovayowi vadja koGermany ovo va pondola oku mona lutu laye konima eshi ofamili yaye ya ongela oshimaliwa noku va eta moNamibia. 

Okwa li eli mondodo onhi-10  kosekundofikola Etosha, i li modoolopa yaTsumeb. 

Pefimbo loshikefa tashi kulukifwa ovanafikola okwa li tava kwena neenghono naashi osha eta opo ovanambelewa vexungomwenyo va dja kouministeli wehongo va holoka okuyambidida ovanafikola.

Ovalilifya okwa li va eta olukeno okumona ovanafikola tava li omunafikola mukwao.

Ova popya tava ti kutya ka shipu okukanifa omunafikola mukwao. Ovanafikola pamwe naNauyoma ove mu tanga tava ti okwa li e na ombili noukumwe muwa navakwao.

“Okwa alushe e na elongelokumwe ngeenge handi mu pula oshilongwa oshi ndihe udite. O’Linn okwa li kaume kange ko shi li nokuhole omashendjo,” omunafikola mukwao ta ti.

Ovahongifikola vaNauyoma ova popya tava ti ofikola yavo oya kanifa omunafikola e na omaano nomikalo diwa.

Kornelius Nauyoma ou e li xe yomunafikola ou a okwa ti okwa hafa nokwa pandula molwaashi olutu lomonamati paife ola fudikwa peumbo.

“Paife ohandi kofa molwaashi olutu lomumati wage ola monika nonande a xulifa,” ta ti.

Okwa ti ka kwa li ha kofa molwaashi oha kukala te li pula okaana kaye oko ke li koshi yetale.

Okwa tanga O’Linn ta ti omumati kwa li e na omikalo, noku na omaano mofikola.

“Okwa li alushe a piti ponomola yotete ile itivali. Tulumukwa nombili momumati wange,” ta ti.

Okwa pandula epangelo pefimbo va kala nokuvayambidida pefimbo loshiningwanima eshi.

O’Linn okwa fiya ko vamwaina vahetatu novadali  vaye aveshe. 

Xe okwa koleka ta ti omakonakono kombinga yefyo lomona waye otaa twikile komesho shaashi fiyo opapa ke na ouyelele we li xwapo kutya osha enda ngahelipi  omonamati owile metale.

-fhamalwa@nepc.com.na