Rudolf Gaiseb

Auditer xenerali, Junias Kandjekeb ge ra mî, marin sîsenūsa ǀgaub di kō!gâsa !nurib Ministeris ǂUrusib dis 2023/24ǁî kurib !aromab ǂhanu tamase sîsenūsa ge hōsa.

Auditer xenerali di kō!gâs !nurib ge ǁguiǂuiba mā hâ xūn tsî !oabadi hîan ǁîn ǁamaǂgans ǀaweǁguib !nâ ūhân diga, xawen ge ǂōǂōsib ǁamaǂgans gaub !naka N$19 miljuns xūn tsî !oabade mātare hâ.

Nē ǂōǂōsib ǀgauban ge ǁîna sîsenūhâ, nē xūn tsî !oabadi, ǂgaoǀkhādi ǂōǂōsib ǀgauba sîsenūs dib ai dīǀoaǀoa tama hîa. Nē dīǀgaub ge ǂganǀgauba ra ūkhâi. ǂHanub ǁAmaǂgans ǂHanumās, 2015 (ǂHanumā 15, 2015ǁî kurib dis) ge ra mî, “… ‘ǂōǂōsib’ ra ǁnaeǁgau !khaisa ǁnāti ī mâsib hîa-i !hū-e ǀgaisase ǁkhōǁkhōsasiba ra mû!goaxa tamas ka i o ǁkhōǁkhōsasib !auba xu ra hā hîgagas, ǀgaisa dâu!khūs tamas ka i o torob mâsib (b) ûib tamas ka i o ǁkhāsib ûib !khōǂgā hâb tamas ka i o ǂnamipeb ǁkhōǁkhōsasib !nâ hâsa.”  Xawe i ge ǀgui mâsi-i nēn di-e !kharu ge marikurib !nâ !nurihe tama hâ. Nē ministeris ge !gâise a ǀaweǁguisa ǀgauba ūhâ, xūna ǁamaǂgans tsî ǁnās ǀkha ra !gûǀhao ǁaxasina daoǁgaus ase, xawen ge nē daoǁgaub hâ hîa ǁnaetisa ǁAmaǂgans ǂHanumāsa xu ra ǀkharase, !oa!ū hâ ǁamaǀgauba !kharaga xūn tsî !oabade mātares, N$35 miljunsa !khōǂgā hâse sîsenū hâ.

 Nau ǀkhāb aib ge ministeris di dana !âba mā-amsa tama māǂuis N$66 miljuns ǁamasa xūn disa ūhâ. “Nausas ge auditer xenerali berosa xu mā-amsa a hō, ǀnî !âga xu nau !âgu ­!aroma marina ǁnā kurib !aroma sîsenūsa, xawes kō!gâsa ge hōǂuis ge, 15 !âgu tsî koro omkhâisens !âgu !nâs N$100 miljunsa a sîsenū!nāsa !khaisa, ǁîs mā-amsa tama hâ, ǂHanub ǁAmaǂgans ǂHanumās di 6ǁî !âb (a) (iii) !naka amaga, tib ge !nuriba ra mî.

Kandjekeb noxopa ge mûs ge, ministeris mariǁhōn mâisa-i N$11.6 miljunsa ǁîb hîa kō!gâs !nâ hâ  marikurib !nâ xūn tsî !oabadi !aroma mātare hâsa, ǁîn ǀnai 2022/2023 marikurib !nâ ge ǁamaǂganhe hîa. “Mātares nē xūn dis ge mā-ams ose a dīsa. Nausas ministerisa ǂganamsensa ge dī, xawe ge mā-amhe tama is khao!gâ,” tib ge ge mî.