RUNDUS – Ministeri, Kai!ā tsî !Garo!ā Omkhâisens dib, James Sankwasab ge mā-amhe tama xawe ra ai!gû-ūhe ǁamaxūs, ǀhû­ǁarebese ra ǂgari-aihe !hū!âdi Namibiab !nâ di disa gere !khâikhom. Mîb gerese i ǀguis khami ī ǂhanu-i hîa Namibiab !nâ !hao!nāsi ǂgaeǂguidi danakhoena nē !hū!âde ǁamaxūsa ra mā-am-e a ǀkhai !khaisa.

“ǀHû­ǁarebese ra ǂgari-aihe !hū!âdi ge nē khāb nau ǀkhāb ti ra ǁamaxūhe. ǀHû­ǁarebese ra ǂgari-aihe !hū!âdi ge ǁîdi !khōǂgā hâ !uru ǂâibasens !oagu nî mûǂamhe tsî tā aitsama a ǀhonkhoe-aisa !hūdi di !nāmab !oagu ga sîsenūhe. Mā-ams hîa hâs ge, khoe-i kai!â !âgu !nâ ǀgui !hūde a ǁama ǁkhā !khaisa, tsîs nēsa ǀhûǁarebese ra ǁanaihe tsî ǂgari-aihe !âgu !nâ mā-amsa tama hâ !khaisa,” tib ge ministera Rundus !nâ ǂoa ge wekheb !nâ ge mî.

Ministeri ge Rundus !nâb ge !hao!nāsi ǂgaeǂguidi ǁanin tsî xoa-aon !hao!nāsi ǂgaeǂguidi din sîsenǁareǁkhāǁkhākhâisa ǂhanusise gere ǁkhowa-am soab !nâ nēsa ge mî. Nē sîsenǁareǁkhāǁkhāsens ge Kavangob Aiǂoas, Kavangob Huriǂoas tsî Zambezib tsîn hoana ge !khōǂgā hâ i. Sankwasab ge ǁhao-aona ge mîba, ǀhû­ǁarebese ra ǁanaihe tsî ǂgari-aihe!hū!âdi di mā-ams chief-i !hao!nāsi ǂgaeǂguis di-i tawa ǁgoesa. “Hana ta tita tsîna !hū!âsa nî ǂhâbas kara, o ta aibe danakhoe-i tawa sī tsî ǁî-i xa chief-i tawa nî sī-ūhe tamas ka i o ǁ­naeǁgau-e, danakhoe-i ǁnā ǀgaiba ūhâ tama hâ, !hū!â-e khoe-e mās diba amaga.

Chief-i nî ǁnāpaxu mā-am, xoa!gao tsî satsa mā, ǁamaxūs ose,” tib ge ge mî. “Xawe ta tita ra !hara !khais ge, danakhoe-i aibe !hū!âsa ra ǂhâba khoe-e N$20 000 tamas ka i o N$30 000 nî ǂgan, tsî nē maris ga mātarehetoa soab ai ǀgui nē khoe-e chief-I tawa ra sī-ū !khaisa,” tib ge ministera ge ǀaro. Ministeri ge ǂgaeǂgui-aona gere ǂgan, nē ǂhanuo!nâ sîsenǀgauba xu ū-oasensa, !gōsase !augab khoena xu, tsî ǁnâi nē !hū!âde sâuǀgara sao ra surigu nî domdorexuse. ǁKhāǁkhākhâis ge xoaǁguisa ǂhanugu di !nāmaba !gāsase ǁhao-aona ­ǁgui!āba in nēs khao!gâ ǀoasa ǂans tsî ǁnâu!āba ūhâ tsî ǀhûhâsigu âna ǂgaoǀkhāsa !harib ai hâ !oabade mās ai !nāsa ǂâisa ge ǂnûi.