OKONGO – Koshivilo shomaulikilo oipindi sha shivika nawa Omaludi neudo otaku ka kala omaudano okatanga kokeemhadi osho yo omaudano okutondoka nelalakano lokuyandja omhito kovanyasha va hangane nokuhafela pamwe.
Omaudano otaa ka tameka momafiku 29 fiyo 31 omwedi ou kokapale komaudano Elia Weyulu mOkongo. Efiku laxuninwa lokulishangifa omafiku 28 omwedi ou.
Oshiwana nashi kwatafane nombelewa yelelo lodoolopa yaKongo kouyelele we lixwa po.
Omukwatelikomesho noku li ta unganeka womaudano Philipus Lazarus okwa ti ei oyo omhito iwa kovanyasha ve lishangife okukufa ombinga momaudano.
Okwa yelifa ta ti ovanyasha ovo ve li koitukulwa ya yooloka navo ova manguluka okukala ve lishangifa okukufa ombinga.
Okwa weda po ta ti osipana keshe yokatanga otai lishangifa koshimaliwa shoN$900.
Omaludi otaa tameke omafiku 25-31 Mai 2026.
Omaludi oshivilo shomaulikilo oipindi ounamapya omo ovanafaalama hava eta eengobe davo di ka ludikwe komaludi.
Eengobe oha di tulwa mondabo okuninga omafiyafano okutala kutya ili pipo ya ondoka ya lya nawa. Ovanahambo ohava kala tava tange eengobe veu dite ombili eshi va lifa nawa oipuka yavo tai vema mo shili.
Ovanafaalama natango ohava kala ve na omhito yokulindifa oikunomwa yavo osho yo oimuna komaludi. Neudo omaludi otaa danwa koshi yoshipalanyole “ounamapya nomapashioni otaa va kale po exumokomesho leliko loshilongo. Omupresidente Netumbo Nandi-Ndaitwah oye e li kahewa komaludi aa.
Lazalus okwa pula ovanyashava op ova holoke momwaalu muhapu komaudano okukala va yambidida vakwao ovo tava landifa oinima yavo.
Okwa ti oudano wokutondoka owa tameka nale momafiku 16 ashike natango otau pula komesho fiyo omafiku 30 omwedi ou.
“Ovanangeshefa nava yambidide ovanyasha noshimaliwa opo va dule okulishangifa okukufa ombinga momaudano aa,”ta ti.
Okwa ti oudano owa fimana kovanyasha shaashi otava hanganifa ovanyasha nokueta po oukumwe.
Lazarus okwa ti osipana yotete tai ka findana oudano wokatanga kokeemadi otai ka pewa oshimaliwa shi fike N$10 000. Osipana onhi-2 otai ka pewa oN$5000, omanga osipana tai kaye ponomola onhi-3 tai ka pewa oshimaliwa shi fike N$2500.