ǀAEǁGAMS – ǂHanub ge ǁgoaǂuis ǀkha ǂnôa, 2025/26ǁî marikurib !aroma a ǂnûiǂuisa maris di sîsenūhes kaise ǂkhawusase ra ǁgausen, ǁaegub marikurib dib di kō!gâs mâtis marisa a sîsenūsas dis khao!gâ amaga. !Gōsase, ǂkhawusase ra ǁgausen !âb ge omkhâisens proxramgu ǂnamipe hâ tsîb ge ǂhanuba ra ǂgan, ǁamaǂgans tsî mātareǀgaugu !nâb ǀgaisa ǀaweǁguiba a ǂhâbasa !khaisa.

!Âǀhuru-aon ǀkha hâ !hoaǂharugus ǀhaos hîa ge ǀhûhâsib ǁanin, ǂkhamkhoen !nandi tsî mâisan !kharaga ministeridi dina xu hâ is tawas gere ǂoa ge wekheb di Donertatsēs ai !hoa, soab ais ge Minister Ericah Shafudahsa ge ǂanǂan, maris nî sîsenūhe ǀgaub di ǀaweǁguib N$79.8 biljuns dib, nē Taraǁkhumuǁkhâb kōse 54 persentgu ǀguiga sîsenūsa !khaisa, ǁnāpas omkhâisens !âb !aroma a sîsenūsa marisa kaise a ǂkhawusa ǀgaub !nâ, 50 persentgu xa !naka hâse. “Sida ge ministeridi ǀkha !hoaǂharugudi !nâ hâ, tare-i !aromas marisa nētikō ǂaub ai ra sîsenūhes tsî tare-i a dīhe ǁkhā ai!gûsa nēs ǂnamipe dīs !aromas tsîna,” tis ge Shafudahsa ge mî, ǁnāpas khaohâ di hîa ǁamaǂgans tsî mātares dīǀgaugu !nâ ra hâ di tsî marina ǀgoraǂgās !nâ ra ǀguitikō-o!nâsigu tsîn ai ǀhawisa gere ǂnûise. Shafudahs ge !âhuru-aona ge mîba, mariǂnûiǂuis ge !Hū!nāsi Omkhâisens ǀAweǁguib (NDP6) !oagu aiǂhomihe tsî ǀgauǀgauhe !khaisa. Sao ran ai ǂâisa ra ǂnûise: sâuǁkhāsib ǀomkhâis, khoesiba omkhâis, tani!kharuǁkhāsib tsî !khōdanas tsîna.

Ministers ge mîs ge, a di ministeridi tsî ǂnûiǂgādi tsîna ǁîdi proxramga NDP6 dana!khaidi ǀkha !gûǁare kai. Nēs ai di ge miniseride !nuri-oa tsî ministersa ge mîba, ǁamaǂgans ǁgaragu tsî saogub !nâ ra hâ !onkhaodi projekn nî dītoahesǀkha ra !âubasenhe ǂkhanisi !âgu tsî tsoatsoa kaihe !khaisa ra ǂgaemâisa. Departementdi ǁaegu ra hâ ǁnâugu tama is, mâpas mâtikō marisa nî māhes dis tsîn ge !nôa-ai!naose hâ. Nē mâsiba oresa hōbas ases ge Ministeris Mariǁhōn disa, ǁAmaǂgans ǂHanumās ǁga sî!kharusase !gâi!gâi!nâs !aroma aoǁguiga ǂgaekhâis ǀkha a ǁaxa, în nēs !nâ-ū ǂnûiǂuisa marina mîsa ǁaeb !nâ ǀaweǁguisaban ase sîsenūhe. –Nampa