Lahja Nashuuta

ǂGuro Ministeri, Elijah Ngurareb ge Namibiab ǂkhamkhoesib ai ǂgansa ge dī, in māsen tsî ǂkhawusa kairan tsî !norasasib !khamaon tsîna ǂkhâ!nâ, !gōsase ǁnān hîa !garo!ā ǀhûhâsigu !nâ ǁan hâna. ǂHanub ge ǀgūǁae ǀaweǁguiba ge !khō!gâ, Ministeris ǂAnǂandi, !Hoa-tsî-ǁnâuǂharugus tsî Texnoloxib dis xa ge nē khoexasiba ai!gû kais ase a ǂanǂanheba.Nē ǀaweǁguisa dīb ge Texnise tsî !Omkurus tsî ǁKhāǁkhākhâis (TVET) ­ǁkhāǁ­khākhâis !nâ hâ studentnn tsî nau hâ māsenxa ǂkhamkhoen hîa !garo!ādi  tsî omkhâisa tama ǁanǁguigu !nâ hâna, hâ!nân ra !khaina kō!gâba, !gâi!gâi!nâba tsî ǂnuwis ka ǂhâbasapa ­nēsa ǂkhawusa kairan tsî !norasasib !khamaon tsîna māsa.

Nē māsenxase ra !â!nâhe proxrami !nâ-ūn ge Ngurareb ra mîsa !oa, ǁnā omaridi ǂkhawusa kairan tsî toro!khamaon dide nî kō!gâhe sao ran ǂnamipe: ǂkhari-omn, !anu āǁgam-e sī-ūbahes tsî !nanǀgaib tsîna ǂhâbasa i apa. “A da hoatsama nē daoba ǀguipa !gû, Mâ ǀgui !gâidīb hoab ge ǁnāti ī ǀhûhâsib kaira khoen tsî !gari-aon ra !gôa!gâhe, ǂhansendi âna ǂan!gâhe tsî ra kō!gâ!nâheba ǂnuwisa !oa ra ǀgū kai,” tib ge ge mî. Nē projeks !aroma nî ǂhâbasa xūn ge !hū!nāsise nî hōhe, ǁnāpa ra Ministeris ǁKhaubas dis tsî !Norasasib !Khamaon ǁHōn !âb tsîna nēpa nî hâ ǁaxasina nî !khōdanase. Ngurareb gere !gāsa kai !khais ge, nē sîsenni hîa nî dīheb māsenxa khoen xa nî dīhe tsîb !ereamxasib hîan ǀaokhoena ǁîn di kaikhoen !oagu ūhâba ūbēhe tama hâsa.

ǀaokhoen ge noxopa ǀnais mâse, ǁîn kairana kō!gâs !ereamsa tani hâ. Ngurareb ge mîs ge, nausab ǂhanuba ­ǁîb ǀkhāba xu ǁkhābase ra dītsâ, aiǁgause ǁkhâkorobe !khō!oamaridi tsî pension maride māsa, xawes ǁnā marisa hoa omaridi, !gōsase îbe a ǂkhawusan tawa gaxuse hâ tamasa. “Nē mâsiga oe-ams aseb ge ǂhanuba ǀhûhâsiba !hanade ǂgābasens ǀkha ge tsoatsoa tsî Otjombindes, Omaheke ǀkharib !nâ ǂnôas !nân ge ǂkhamkhoen tsî ǀhûhâsib ǁanin tsîna !hanaǂûn ǀkha ǁîn ǀhûhâsigu omaride ra ǂûma.

Nau !hao!nāsi ǂgaeǂguidi tsîn ge nē îxa xū-e ǁgaeǁgaesa !oa ra ǂgaoǂgao!nâhe,” tib ge ǂguro ministera ge mî. Nē sîsenni hîa māsenxa tsî ǁnā-amaga ǂû-i !aroma sîsens tsî maris !aroma sîsens !nâ-ū nî mādawa-amhe. Ngurareb ge hoa Namibiaǁ­în tsî aitsama mâbasen ǂnûiǂgādi tsîna ra ǂgan, nē proxrami !nâ ǁhaosa.