ǂNŪǂGOAES – !Nae!khai-i ge tātsē !anu ǂhawe-e ūhâ tama hâ. ǀGui-i ǁîs di-i ge ai!â gere ǂoa sâǁaeb !nâ !nae!khais ase ge xoamâihe, ǂNūǂgoaes di ǂHanub ǀAeǁǁgâub ge ǂguro !nās ase !naiǁōb ǀae!khōs senters di daode a ǁkhowa-ams khao!gâ. Nē senters hîa ǀasa ǁaeb di ǀgapiǀgau huisenxūna !khōǂgā hâb ge Social Securitis Namibiab (SSC) dis ge mā N$20 miljunsa xu N$5 miljuns ǀkha ge ǂnuwihe tsî ǀgūǁae noxopa mâǂoa hâ ǂhâbasa xūna nî !khō!oa ǀoasase sîsentsoatsoas ase.
ǁNāpas ge dana ǂhôasa gere mā soab ais ge ǂurusib ministers, Dr Esperance Luvindaosa ge mî, nē ǁaxasib kaise ǀō-aisa sī!nâsa ǂhanub ǁgūtsâdi !nâ ra sī-ūsa, ǀonǂgais ai hoa ǀae-aon supuse ǀae!khōde a hō ǁkhā ǀgauga ǂnuwis tsî ǀae-aon ǂhâsiga ra gowaǀî ǀae!khōde hoa Namibiaǁîn !aroma ūhâs tsîn khami.
“Nē senters ge ǂnuwiǀuidi tsî masindi ǀguide ǂâibasen tama hâ, xawe ǁnāti ī !âubasensa ǁnā ǀae-aon hîa kurigu !oede !naiǀaeb ǀae!khōdi !aroma kaise !nūse ǀAeǁgams ǁga nî !narise ge ī in !aroma !khōǂgā hâ. Nē ǀae-aon ge ǀae!khōsa si !khō!oas !aroma !nāsa ǁaega sorosise tsî marisise gere dītoasen,” tis ge Luvindaosa ge mî.
“!Naina ǀae!khōs a ûiba sâus !aroma hâ huib ase ra mûhe, xawes ge nēsa !gaunas ǀguisa ī tsî ǂurusib ǀamsats go a sī!nâ ti ǂâibasen tama hâ, ǀuniga !gâi!gâb !haros !naisa ǀkhaehes ǀkha ǀgui ûiba a ǁawoǁawo ǁkhā amaga”.
Ai!âs ge ǁîsa ge mî, ministeris ǁîs di ǀaweǁguigu !nâ !hū!nāsise !naina ǀkhaes !oabade tsoatsoasa ǂâi!nâǁgui hâ !khaisa. “Nē dīǀgaub ge kaise a ǂhâǂhâsa ǁîb ra gaxuse ûis ī-ǁkhāsiba ǀae-aona mā, ǀae-aona gaxu ǁaega nē masindi ai hâsa xu ūǁnâ tsî ǁîna ǀoasase ǁîn sîsen!harodi !nâ oa tsî !hūb di ǀomkhâis !nâ huis aiǂhanuba mā amaga.
ǁNā-amagas ge nē tsoatsoas ǂNūǂgoaes !nâ go hāsa !goaxa ǁaeb ǀaweǁguigu !nâ !hûǁaresase nî !amǂgāsa,” tis ge ge mî. ǁKharas ǀkharisi mûǂamaob, Dawid Gertzeb ge mîs ge, nē senters ǀae!khōde ǁnān hîa nē !oabade ǂhâba hân !aroma ǀgūse nē kharib khoena ge hā-ūbasa. SSCs di ǀkharisi danab, ǁKharas tsî Hardap ǀkharikha !aromab ge ge mî, nēs a ǁgauǁgau ǁîn ǀhûhâsib !oagu ūhâ !ereamxasiba dīǂuis disa, nēs !nâ-ū ûiga sâus a !uru amaga.