ENGELA – Ovanhu 213 va dja koitukulwa ya yooloka ova pewa epango loshali lomikifi domedimo pefimbo loshikonga shouhaku sha ningwa oshivike sha dja ko.
Omukwateli komesho woshikonga eshi omundokotola Akutu Munyika okwa ti otava lalakanene okupanga nokuningila  ovanhu omakonakono omikifi  da yooloka domedimo.
Oshikonga oshi kwetelwe komesho kovanailonga voundjolowele 20, mwa kwatelwa eendokotola, ovapangi osho yo ovalihongi tave lihongele oundokotola va dja koshipangelo shaNandjokwe.

Okwa ti ova panga ovanaudu koipangelo ngaashi Omuthiya, Tsumeb, Eenhana, Okongo oshoyo Engela.
Munyika okwa ti oshipangelo shaKongo osho shimwe  shi na omwaalu muhapu  omo ovanhu 61 va pewa epango.
“Oshikonga eshi osha tameka momudo 2022. Oha shi ningwa luvali omudo keshe,” ta ti.

Okwa yelifa ta ti oshikonga eshi oshi li opolongalama shouministeli wouhaku molwashi otai lalakanene okukondjifa omikifi domedimo.

Munyika okwa ti oshikonga eshi paife osha lukilwa omundokotola e na owino Fillemon Amaambo.

Amaambo okwa tumbalekwa shaashi okwa longa oshi longa sha fimana moshikondo shouhaku.

“Okwa deula eendokotola dihapu. Okwe tu longa ounonga nghene tu na okuya kula ovanaudu,” ta ti.

Ovanaudu va pewa omayakulo epango okwa li va hafa unene nova pandula epangelo molwashi ota li longo noudinini okuyandjaneka omayakulo ouhaku koshiwana.
–fhamalwa@nepc.com.na