ONESI – Elelo lyOpamuthigululwakalo lyUukolonkadhi oshiwike sha zi ko okwa li lya gandja omagano gooshako dhuusila wepungu kaakwashigwana mboka ya pumbwa omakwatho momagumbo ngoka ihaga tema omulilo noga gumwa konkalo yoshikukuta. Mokuyamukula keindilo lyOmupresidende Hifikepunye Pohamba kAanamibia ayehe ya yambidhidhe iihakanwa yonkalo yoshikukuta, elenga enene lyElelo lyOpamuthigululwakalo lyUukolonkadhi, tatekulu Daniel Shooya pamwe nomalenga gelelo ndika okwa li ya gandja omagano gooshako 600 dhuusila wepungu kaathigona nenge mboka ya pumbwa ekwatho ndika omolwonkalo yaNakiidhi kaHalwenya ngoka ta tapateke pethimbo ndika miitopolwa nomomikunda odhindji moshilongo.
Mwene gwomukunda Otsika, Nestor Iipinge, okwa tseyithile aakwashigwana mboka ya li poshiningwanima shegandjo lyomagano kutya omagumbo awike gatano okuza momukunda kehe taga pewa omakwatho ngaka giikulya yoshikukuta. Iipinge okwa shilipaleke mboka ya mono omakwatho goshikukuta kutya omagano ngaka itaga ti kutya itaya ka pewa we nenge itaya ka mona we omakwatho giikulya yoshikukuta ngoka haga gandjwa kepangelo – kokutya nonando aanamagumbo mbaka ya pewa omagano ngaka goshikukuta natango otaya kala nokumona omakwatho gepangelo ye nasha noshikukuta.
Mokupopya poshituthi osho tuu shoka, Ngoloneya gOshitopolwa, Omusati meme Sofia Shaningwa, okwa tumbula kutya aanambelewa mboka kwa li ya pewa oshinakugwanithwa sheyalulo lyaakalimo/aakwashigwana mOshitopolwa Omusati oya pumbwa okuyalula ishewe oshitopolwa shika, oshoka omiyalu dhoka dhi li po pethimbo ndika kadhi li mondjila, nonkee otadhi yi moshipala nokunayipaleka omalongekidho – oopulana moshitopolwa. Meme Shaningwa okwa li wo a ningi eindilo lyowina kaanangeshefa ayehe opo ya kuthe ko oshiholelwa shika oshiwanawa shoka sha ulikwa kElelo lyOpamuthigululwakalo lyUukolonkadhi nelalakano okuyambidhidha wo epangelo moonkambadhala dhalyo okunengeneka iihuna nonkalo yoluhepo mokati kaakwashigwana mboka ya gumwa konkalo yoshikukuta shoka sha dhiginina unene pakuyeleka nomimvo dhilwe dha pita. Onkalo yoshikukuta otaku tiwa kutya oya guma aakwashigwana ye li lunga paantu 900 000 (miitopolwa yayooloka moshilongo).