Omupresidente Netumbo Nandi-Ndaitwah okwa ti okwa hafa okumona oikunino younamapya tai xumu komesho noina ovanhu tava longo nondjungu okuyambula po oshikondo shounamapya moshilongo.

Edi Nandi-Ndaitwah okwe di popya Omaandaxa pefimbo a talela po oshikunino shedina Uvhungu-Vhungu shi li koshitukulwa shaKavango East.

Omupresidente oshivike sha dja ko natango okwa talela po oshikunino shi li kEtunda moshitukulwa shaMusati nelalakano lokutala nghene tashi xumu komesho.

Natango Omupresidente okwa talela po oporoyeka younamapya i li komukunda Ekoka moshitukulwa shaHangwena mexuliloshivike.

Okwa enda pamwe naminista wounamapya Inge Zaamweni-Kamwi osho yo ovanambelewa va yooloka vepangelo.

Omupresidente okwa ti elalakano lokutalela po eeproyeka edi dounamapya okuninga omapekapeko nghene oilonga tai longwa nokutala ngeenge otadi xumu tuu komesho ile otadi teka po.

Okwa popya ta ti ounamapya owa fimana shaashi otau yambula po eliko loshilongo tashi pitile mokulandifa oilongomwa ya dja moikunino.

“Oikunino aishe nda talela po oya eta po eemhito doilonga kovanyasha. Onda pandula nondina ehafo okumona oikunino yetu yomoshilongo tai xumu komesho nokulonga oikulya yetu vene,” ta ti.

Efiku tuu olo, a talela po oikunino ivali shimwe oshi li koshitukulwa shaKavango East omanga shimwe oshi li koKavango West, Omupresidente okwa ti popya nenyanu ta ti oikunino oya etela ovanhu ounongo.

“Ounongo tau monika mokulonga moikunino owa fimana shaashi otau kwafele ovanailonga va kale ve navo owino ya wana okulonga noikunomwa ya yooloka,” ta ti.

Okwa ti otashi ulike efano liwa ngeenge Namibia ta longo oikulya yaye mwene okupitila moikunino ya yolooka yomoshilongo.

Omupresidente okwa popya ta ti keshe omudo ota kala nokutalela po oikunino ei shaashi oshi li oshinakuwaniofa shombelewa yaye onga omutwe woshilongo okutala kutya oshikondo shounamapya nghene tashi xumu komesho.

“Ovanhu nava twikile okulonga nelitulemo moikunino opo iha teke po. Ovanailonga nava twikile okupewa omadeulo kombinga younamapya opo va mone ounongo upe,” ta ti.

Oikunino oyo ya talelwa po kOmupresidente ohai kumwa omababana, omapungu, omandjebele, oikapa, oihakautu nosho tuu oikunomwa ya yooloka.

fhamalwa@nepc.com.na