OSHIKUKU – Ba yahi ba mwa muzi wa Okando mwa silalanda sa Okalongo ili mwa Omusati ba filikanyizwe ka taba ya ku yumba mbututu wa mazazi a malalu fela, yo na fumanehile a apesizwe ka kubo ni ku mu tuhela mwa simu.
Mbututu wa musizani na fumanwi lizazi la pili mwa biki ka batu bane ba fita mwa zila mi ba zibisa mapokola, mi mapokola ba nga mbututu ni ku mu isa kwa sipatela se si bizwa (St Martin’s Hospital) mwa Oshikuku.
Ka ku ya ka mazwi a yo muhulu wa sipatela Dr Samuel Awe na talusize kuli Mbututu na tisizwe kwa sipatela ka nako ya musihali (14:30) ka mapokola ba kwa Okalongo.
Mubili wa mbututu no cisa ku fita fa 38 ili yona mucisezo o sa zamaeleli ni muciseso wa maemo a mutu. Mbututu na bonahala ku hula ka kuli mukubu wa hae ne se u zamaya u oma, Dr Samuel Awe a talusa kuli mbututu na bonahala kuba wa mazazi a malalu kapa a mane.
Dr Samuele Awe a talusa kuli mbututu na li mwa maemo a izi hande kakuli ka samulaho a ku tatubiwa kwa fumaneha kuli na sina kakokwani ka ka biwa HIV, mbututu u sa li mwa sipatela sa baima.
Mbututu wa musizani yoo na beilwe libizo la Christine Tunomukwathi ili libizo la yo muhulu wa sipatela sa St Martin, ili yena Christine Mayungo.
Muina situlo sa Omusali ili yena (Govornor) Sophia Shaningwa na talusize kuli ki maswabi ku bona kezo ya lunya ni sibi ka kuli mbututu u yumbilwe mwa maemo aza li hande mi u komokisiswe ki taba yeo.
Shaningwa u elelize banana ba banyinyani ba ba se ba bile bashemi kuli basa yumbi limbututu za bona mwa macacani kono ba ise limbututu zeo kwa sipatela kapa kwa mapokola kapa kwa ofesi a mwa silalo kapa ku mu fonela fa nombolo ye 0811221753.
Ku yumba banana ku shinya simunanu sa naha ya luna kukuli bona limbumbu ze yumbiwa ki bona ba zamaisi ba naha ya luna mwa linako ze taha. Lu bata kuli lu ñatafale mwa naha ya luna, a bulela cwalo.
A talusa taba ya ku yumbaka limbututu ku bao ba eza kezo yeo kuli ba i kutwa cwani linja ha li sweli ku ikushula limbututu ze yumbilwe.
Munoli: Loide Jason