WINDHOEK
Oombashu sho tadhi nyenyetwa nokupewa ombedhi kutya otadhi teya po oshigwana, kombinga onkwawo oNamibia Shebeen Association (NASA) omathimbo ga zi ko oya tameke noproholama yayo okuyambidhidha nokupashula aantu kombinga yiinima ya guma oshigwana.
Oproholama ndjika otayi lalakanene okundjeka po endungiko kombinga yelongitho lyiikolitha, eshunitho pevi lyomayogelelo, onkalonawa yaanona, omithika dhuuyogoki nuukalinawa, Oveta yOmalovu niikwawo yilwe.
Omahangano gamwe moshigwana otaga ti elongithonayi lyiikolitha oshowo onkalo yoombashu pakwalukehe oyi li onzo onene yomaupyakadhi gopaundjolowele moshigwana noyi na iilanduli iiwinayi pankalathano nopauhupilo woshigwana. Oshikwawo, ooyene yoondingosho oya tala ko oombashu ongoongeshefa dhawo dha simana moka hamu ya zile uuhupilo.
Nonkambadhala okuhanganeka oongundu dhika dhopaali nokulumba pamwe nombili, omupresidende goNASA, Veripi Kandenge, ota ti omathimbo ga zi ko oya ningile oshigongi mOkahandja. Kandenge pamwe nayakwawo ye na olune naanangeshefa mbaka aashona okwa li wo ya talele po olukanda Five Rand, ndoka lwa tseyika nawa omolwoombashu neyakulo ewanawa. Kandenge okwa holola wo eyemato lye shi nasha nomayogelelo, ta ti aantu aashona yowala oyo ya tseya sha kombinga yOveta yOmalovu, Oveta yOnomola onti-6 yomumvo 1998.
“Moondoolopa odhindji, aantu kaye na omauyelele kombinga yOveta yoyene. Onkalo ngaashi yi li pethimbo ndika, otayi pula endungiko lyoshigwana miimpungu yayooloka,” Kandenge ta ti.
Pauyelele waKandenge, oombashu dhoka dhi li momahala gomagumbo otadhi yugu aantu omauthemba gawo. Omayogelelo, okwaanuuyogoki, okutalitha aanona omiyonena nelongithonayi lyondungo oyo yimwe yomomaupyakadhi haga popilwa oombashu. Kakele, oondingosho odhi li wo onzo yuuhupilo woshigwana moka hamu vulu okuza oshimaliwa shokutuma omaluvalo gawo koosikola, okugandja ompito yiilonga nokufuta omayakulo galwe.
Okutala kiinima mbyoka, Kandenge ota ti NASA oku na oshinakugwanithwa okudhimbulukitha iilyo yawo kutya oombashu odhi na okukaleka po omithika omiwanawa dhuukalinawa, okugandja oshiholelwa oshiwanawa okunwa omalovu, okukondolola omakudhilo nokugamena onkalonawa yaanona, mwa kwatelwa okwaalanditha omalovu nuusekeleta kaanona aashona mboka ye li kohi yomimvo 18 dhoka dha tulwa po paveta.
“Tse inatu hala ooyene yoondingosho ya pitike aanona momahala gawo. Yamwe ohaya ti aanona oye hole okudhana osinuka, inatu shi hala shoka,” Kandenge ta ti.
Poshigongi shoka sha gongalelwe kaantu 120, aakalelipo yoNASA okwa li wo ya topolela omahala gomanwino ookondoma unene mpoka oonkolwe hadhi ulike omaukwatya gadho ngaashi okutuka aantu yakwawo, okuholathana kopaihulo oshowo ekwatonkonga.
“Tse otatu kambadhala okuyambula po elongithonawa lyomalovu. Nguka ogo omukalo gokukeelela omaupyakadhi ngoka haga vulu okuza momainyanyudho. Okunwa nawa omalovu otaku pula eihumbatonawa, okukaleka po uukwatya woye mwene oshowo oshinakugwanithwa,” omupresidende goNASA ta yelitha.
Ehangano ndika olya hala okukumika oshigwana shi kale opolisi kusho shene, moka tashi kala nokulopotela opolisi kombinga yomaihumbatonayi kehe ngaashi uufuthi nelongitho lyoondjembo shaa li paveta.
Shika osha li oshigongi shotango shoka NASA a unganeka omvula ndjika. Iitopolwa mbyoka ya shonekwa tayi ka talelwa po oyo mbyoka yomuumbangalantu woshilongo. Kakele, shika otashi ka ningwa ashike ngele opwa monika oshimaliwa shoka tashi ka utha kutya uunake iigongi mbyoka tayi ka ningwa oshowo kutya otayi ka ningilwa moondoolopa dhini.
Pokati mpoka, oombashu omathele natango odha pata miitopolwa yayooloka moshilongo sha landula koshikonga sha ningilwe kopolisi omvula ya zi ko okupatitha oondingosho dhoka hadhi landitha kaa dhi na oolisinisa.