NKURENKURU
Mbunga politika zoSwapo kazifundire mahoroworo aga kaga kereko sinkwa ntani modoropa zope moNku-renkuru, momukunda horowero Kavango. Mbunga zaSwapo kazigusire mavango ntazimwe mwantambali.
Siruwo ose mbunga zaRP kazigusire nye eli limwe kalihupireko.
Konyara vantu vatungamo wokusika ko3000 kava kere posilika apa kavatungikire vakansela ava wovape.Mokukwama yitundwamo eyi kazi geve mbunga zomahoroworo (ECN) konyima tupu zokumana kuvarura mbunga zaSwapo kazifundire momunene kwato mbunga ezi kazi simbagwilireko.Azo kazigwene mazwi gana siki ko1375 ano ogu kakwemeko RP nomazwi 103.Edi kadi kere ure unene kuna kara DTAmazwi 12, CoD 29,ano Nudo 6 tupu.Ogu kauuyungire kovanambudi momasa siku goutanao konyima tupu zokumana kuvarura kakere muwapayiki goSWAPO momukunda Vincent Likoro age katente asi ngendeseso nazinye kaziwepe kwato eyi kayipirepo.Age kapandwire Rp asi yizombunga zina gwana evango momahoroworo aga siruwo oso edi dimwe kadiyinsumpilire.
Konyara noperesenta 90% dovantu vatunga moNkurenkuru kavauyungire kupitira momahoroworo nomukavalikidire asi awo kuna huguvara mbunga politika zoSwapo, ano ava 15%kapi kavahorowere eyi yina kureta kwetu mapuliro.Nye nampili ngoso tuna hafa nokutara asi sitambo sina kara komeho zokukulika doropa zetu ezi zompe.Situmbukira esi sidigu morwa twahepa kulituramo asi yininke yetu yisikemo mouta wakora.Mbunga zaSWAPO kakupilire tupu mazwi 37 vaguse mavango nagenye.Ano kwa RP kayikere asi sirugana sosinene morwa evango eli kwakere lya Swapo, mokugwana evango kapisi ureru.CoD, DTA naNudo kuna kulincakagwira nokutanta asi ngendeseso nazinye kazigenderepo nawa kwato matjiliso.Ame kani hefe mokutara ngendeseso zangesi.Ame kani gazarere asi mbunga zetu nazigwana mavango gavali ndi limwe ngoso nye kapi yina tutompoka.Mberewa zomahoroworo twahepa kuyizipandwira kweyi kavarugene.
Eyi yininke yoyiwa yimo ana kutanta muna mberewa gwaNUDO Theophelus Uahongora.Ogu nage kaligwire nendi kakere Shikerete Kauyu gwaCoD ogu nage katente asi yininke kuna gendi nawa nye kuna kara udigu asi vagwane evango.Vahorowoli kava monekere ngurangura zonene pomavango gokuhorowera aga kaga kere ntambali ano limwe lyokugendagura kapisi lyokukarererapo.Evango lyokuhorowera kalikere posure zaHigher kalipaturukire povili zauhambombali muntu gokuhova ogu kahovere kuhorowora kakere Beata Kaliketu gonomvhura nomurongontano nantazimwe.
Ame kuna pinduka ngurangura zonene povili zountazimwe yipo niya horowore, age kuna kuuyunga eyi siruwo oso age kuna kwaterere sikarata sendi sokuhorowesa.
Tupu kamene yiyo kaku bubukire vakurupe vatatu.Hawe tomono ngurangura zonene vantu ava vatunga mevango eli tovamone vana litu monomukweyo yipo vakahorowore.Ano kevango nye lyahana asi lyokukarererapo mukurona gomahoroworo Phillemon Kanime katente asi ngendeseso kuna wapa unene,unenepo eruganeso nomahina.Yokuhorowesa komahina nayo kayirugene nye nkenye eyi yakuhoroka toyigwana yina kasika komberewa zonene.Vantu kuna kuwiza moomu vavhulira vanahara evango eli likare doropa yimo ana kutanta Kanime.Vantu wokusika ko1782 yiwo valitjangesa vahamene momahoroworo,nye 1416 tupu yiwo kava kamonekere vakahorowore.Vakansela woSWAPO kuna kara Ausiku Hausiku ,Hendrina Naingwendje,Mirijam Sikwaya,Erastus Sitentu,Beata Kanyanga naThomas Ngoma.Ano gwa RP kuna kara Reino Simbungu.