OPUWO
Ovatuta pOtjerunda, Okatumba na Mbombo mavetjeme nozondjou outuku ndenyona ovikunwa vyao.
Onganda owenge nokuhandjaura ozombuze indji o Namibia Press Agency, ousupi o Nampa, yakaryangera ovikunino po Katumba mbyanyonenwe iyozondjou. Yakamuna kutja mena ronyoneno yovipuka imbi ovatuta kavena ovinyikorwa okunyikora ekweze romanyikorere tjireya. Otja ku Vemunikaije Muundjua nguno otjikunino tjozomiriva wina tjitjanyonwa, ozondjou ndatu zahita motjikunino tje nazehungama osemba komatanga wa kawitji nu munao azenyono omiti vyozomiriva. “Otjiihamise kutja omundu wamorosa omasa novimariva vyoye ovingi okukondja kutja pekare orumbo tjazumba okunu otjikunino atjihe posyo koruseinina ovikunwa avihe vyanyonoka,” Muundjua watja nao.
Ozondjou wina zanyona orumbo rotjikunino ihi nu munao ozongombe otjizahita motjikunino naze tjinyoneneko. Muundjua watja ohoromende yasere okuhakahana okuyeta orumbo rorutjeno otja tjiyayanisa okutjaera ozondjou azehahiti motjikunino. “Wina ohoromende yasere okukondja otjisuta tjimaiyandja kovatuta mbapandjara ovikunwa vyao mena rozondjou ozonyone inda,” Muundjua watja nao. Otja kuye ondengu yovikunwa vye imbi itei po N$15,000.
Omututa warwe wotjikunino wina tjitjanyonwa iyozondjou ndatu inda eyuva tjingero o Topias Kambolombo wa Katumba. Waraera o Nampa kutja zayatakanene motjikunino tje nu mokuyatakana ingwi azenyono ovikunwa vyondengu ape o N$800. Ovikunino vyarwe mbyanyonenwe ovya Kanahonga Kaumbirua wa Tjerunda, Tofeni Tjimuhiva wa Katumba nomutengwa Kahindjongo.
Ouzeu tjingewo womanyoneno wovikunino iyozondjou wamunikwa movirongo tjingevyo mo 2006. Otja komutjevere wovipuka mo Ministeri yOkuti nOvaryange, James Sambi, kwahindwa otjimbumba okuza momberoo kovirongo peke peke mbyaa vikondjisiwa iyozondjou okukakondjisa okuzeramba nokuzetirisa mokuti. “Ovimbumba imbi vyahindwa kOkatumba, Otjozongombe na Muviha,” Sambi watja nao.
Sambi waraera o Namba kutja o Ministeri ye kaiyandja otjisuta konyoneno ndjatjitua iyovipuka vyomokuti posyo otumbo tuondjeverero yavyo tuayandjerwa okurandisa ozondjou ndeyandja ouzeu kovaeve no kuungirisa otjimariva ihi okusuta oviwana vyato mbyatunwa. Otja kuye orumbo rorutjeno otjina tjitjaetua iyorutu Romekurisiro Omaparanga Wokozombanda Nondjeverero yOkuti, o Integrated Rural Development and Nature Conservation, ousupi IRDNC, posyo ngunda kaeyayetua momaunguriro mena rouhepe wotjimariva.