WINDHOEK
Ookansela yopashitopolwa yahamano mboka ye lile po aahogololi moshitopolwa shaCaprivi ohaya pewa oonkondo okuhogolola Ngoloneya gOshitopolwa okuza mokati kawo, ndele kashishi ngaashi hashi ningwa ngashingeyi sho ngoloneya ha hogololwa kuyalwe nokupewa aahogololi.
Dhika odha popiwa kuKansela gOngundu yoSwapo moshikandjohogololo shaSibbinda, Felix Mukupi, ngoka e uvite kutya kape na uuyuuki mokuhogolola Ngavena gopashitopolwa okuza nkene ngoloneya goshitopolwa shoka, John Mabuku goDTA a yile ontuku koBotswana 1998 sha landula kiikolokosha yokutenda ko oshitopolwa kuNamibia.
Okuza sho Mabuku a thigi po iilonga ye yUukansela wOshikandjohogololo shOndoolopa yaKatima, Bernard Sibalatani oye a ningi ngavena goshitopolwa nokwa li ishewe a hogololwa konima yomahogololo ga hugunina. Mukupi ota ti oshitopolwa shaCaprivi oshi li konima pakuyeleka niitopolwa iikwawo ngaashi Kavango okutala komapendulopo gooprojeka dhuunamapya oshowo oopate molwashoka ookansela mOshitopolwa shaKavango oya pitikwa okuhogolola nemanguluko ngavena ngoka e na ontseyo miinima ya nika omapendulopo. “Paveta yOmalelo gOpaitopolwa, ookansela okwa li ye na andola okuhogolola ngavena gopashitopolwa, ihe moshinima shaCaprivi hasho shi li ngaaka, oshoka ngavena oha hogololwa kuyalwe,” Mukupi ta ti, nonando okwa dhika oonyala mevi okupopya edhina nenge ehala mpoka pwa ningilwa ehogololo ndika.
Ota ti Ngoloneya okwa ndopa okuninga iigongi yi nasha nokukundathana iinima ya guma omapendulopo ano pokati kookansela yomoshitopolwa nElelo lyOndoolopa.
Mukupi ota ti ngele ookansela oya pewa ompito okuhogolola ngoloneya mokati kawo yene, nena onkatu ndjika yiilonga otayi ningi ethigathano, naangoka ta ka hogololwa ota ka kambadhala okulonga nuudhiginini, kokutya ngele oya ka ndopa ota ka pingenwa po.
Kakele onkalo yopethimbo ndika itayi etitha omapendulopo moshitopolwa shaCaprivi, moka mu na omilonga ihaadhi pwine, ihe aakalimo oyendji kaye na omeya gokopomba, omanga oopate odhindji kaa dhi na oteya. Nonando oshitopolwa shika okwa li shi na okukala onzo onene yiikulya moNamibia, omolwevi ewanawa noonzo dhomeya ogendji, oshitopolwa shika oshithigona sha shiga ko, Kansela gongundu yoSwapo ngoka e uvite kutya ethimbo lyelunduluko mewiliko ongashingeyi ta ti.
Onzo yEpangelo ndjoka inayi hala edhina li holoke moshifo, otayi ti ombedhi oyi na okupewa Elelo alihe lyOshitopolwa sho lya ndopa okutula miilonga ooprojeka dhomapendulopo moCaprivi. Onzo ndjika otayi ti Epangelo ohali gandja iimaliwa yoomiliyuna yi nasha nomapendulopo moshitopolwa shoka, kakele iimaliwa oyindji ohayi shunithwa mo moshiketha shepangelo ngele inayi longithwa melalakano lya nuninwa. Onzo ndjika oya yelitha wo kutya oshitopolwa shaCaprivi osha pelwe N$124.4 million dha kwatela mo N$4.1 million okutunga ongalama okuza poNgoma ya thinda koMuyako, N$7 million dhondjila tayi kwatakanitha Kongola noongamba dhaZambia, nosho tuu.
Pamulekeneno goshimaliwa shonuumvo oshitopolwa shaKavango osha pewa N$227.3 million dhi nasha nooprojeka dhomahumokomeho dhayooloka, oshitopolwa shaKaras osha pewa N$247 miilion, omanga Omusati gwa pewa N$113.7 pakuyeleka niitopolwa mbyoka.