MoVenduka
Ruha rumwe romuntu runa kara asi simpe kuna kumoneka nawa kavarugwene vana rutetagura nahena vanarutura moyiplastika yoyisovagani pepi nosipangero somoGrootfontein.Muuyungilipo vaporosi Chief Inspector Angula Amulungu katente asi rutu romuntu oru kavarugwene, nye kuna kurusinganyekera asi kuvhura rukare romukadi,kavarugwene koyihayonovili 09h20 mositarata esi vana kutumbura asi Dokotora Ngarikutuke Tjiriange,pepi nosipangero somoGrootfontein.
Rutu romuntu oru kava rugwene varugani vamuni zaGrootfontein,ava kava kere tavazeresa doropa nye yiyo kavayalitwire mosiplastika sosisovagani esi kavatulire rutu rwana kufa ogo.Apa kavatere mosiplastika oso awo yiyo kavagwenemo mawoko nomutwe yimo ana kutanta Amulungu.Ano vaporosi apa kava kasikirepo tavakagwana hena sipundi sina asi kara mehauto hondeko ntani yidwara yina karamo yomukadi.Poopo pevango olyo kapa kere hena mudwaro gwina ava litura vakadi komavere.Vaporosi simpe kapi vana diva asi sihorokwa sangesi sahepa kulifana ndi asi ava vana rugana eyi yiwo tupu varugana edipago eli lyahorokerere kevango eli vana kutumbura asi B1,ndi nampo ava peke.Vakadi wokulisigasiga omu muna kara Sanna Hellena //Garoes naJuanita Mabula kwavadipaga momukaro googu.
Ose kuna kugwana tupu rutu romuntu makura tosinganyeke asi nampo ngandi,yipo asi ngesi kapi tuna diva asi kurugana ngapi.Womberewa ezi zokutara asi yilye ogu ntani yilye ana dipaga ntaantani tupu vakasike pevango vakakona-kone.Ngesi udigu muntu otante asi maruha gorutu oru vana gwana gagumwe tupu ndi hawe.Rutu oru kuna kumoneka asi kuvhura kukara romusesugona.Ruha rorutu oru kavagweneko ngesi kuna kara kokira zomoSomeya ano siruwo oso vaporosi awo kuna kukona-kona simpagwa oso.Mukurona gomberewa zomakona-kono nonomahina gedina Dokotora Paul Ludik kuna kumundindira akatare asi ngapi nava rugana.
Gumwe ogu kakerepo apa kavagwene rutu oro katente asi sihorokwa sangesi kuna vatukukisa unene.Nyama zomuntu ezi kazikere simpe mpeempe.Mutwe kuna kumoneka ngwendi kuna kutura momema gomapyu.
Kuna kumoneka usovagani,kwato nampili kunuka.Yimo ana kutanta ogu kakerepo nampili nsene otara kompepo ezi tuna kara nazo.Sihorokwa sangesi kuna likwama tupu konyima zonovili 72, apa vaporosi kavakavhumbikire rutu rwanakufa gonomvhura 18,Viola Swartbooi komayendo komoKhomasdal.
Amulungu katente asi mafano aga kavagwene kwaSwartbooi tavakakaruganesa mokukona-kona nomfa daJuanita Mabula na Sanna Helena //Garoes,marutu gawo kwagagwana momukunda gwaKhomas nomvhura mbali dina pitipo.Vaporosi kavahundilire vantu ava vatunga moGrootfontein vana kupapara gwawo vakamone mukurona govaporosi momukunda gwaOshikoto Deputy Commissioner Annemarie /Goagoses kofunguna ezi 067-2235001 ndi 0813352619.