WINDHOEK
Omukuluntu gOpolisi yaFrance mUumbugantu waAfrika, Laurent Cozanet metitatu okwa talele po Okollegi yOmadheulo gOpolisi – Patrick Iyambo Police Training College okutala omadheulo gaanambelewa yOshikondo shOpaulumompumbwe mOpolisi. Omukalelipo gwaFrance moNamibia, Phillippe Bossiere oshowo aanambelewa aakuluntu mopolisi oya ende pamwe naCozanet. Omuambassada gwaFrance ota ti ombelewa yuukalelipo woshilongo she moNamibia oya kala nokuyambidhidha ooproholama dhoNampol, mwa kwatelwa etotepo lyoshikondo shiilonga yopaulumompumbwe, shoka sha tseyithilwe pambelewa muJanuali nuumvo.
France okwa gandja okapandi N$70 000 koNampol okudheula aanambelewa moshimpungu shika. Okuza momumvo 2003, Namibia okwa pewa N$5 million. Omupopiliko gOpolisi Komufala gwOpevi, Hophni Hamufungu, ota ti oshikondo shiilonga yokutondoka onkugo otashi ka kwatha aapolisi mboka ye li po nale mokuyamukula koonkalo dhika moNamibia. Okuza sho sha totelwe po, oshikondo osha mona aanambelewa ashike yomuyalu omushona mboka ngashingeyi taya longele mOshakati oshowo moKhomas pamukalo gokuninga omalolelo. Hamufungu ota ti ope na aanambelewa inaya konda 30 mboka ya dheulilwa iilonga yetondokonkugo. Kakele, aanambelewa 18 oye li ngashingeyi momadheulo giiwike iyali. Nampol oku na ehalo okwaandjaganeka iikondo yopaulumompumbwe andola miitopolwa ayihe omulongo niitatu moNamibia. Oshitopolwa kehe otashi ka pumbwa okukala naapolisi mbaka ye li 30 ya dheulikika moshimpungu shika.
Ota ti oshikondo shopolisi osho shimwe shomiikondo mbyoka hayi lunduluka ethimbo nethimbo. Onkee, Nampol ota ka nyanyukilwa nokutaamba ko eyambidhidho kehe tali ka shilipaleka kutya etanga lyokukaleka po oveta nelandulathano oli li pomuthika gu li nawa sho omahumokomeho omape taga holoka moshimpungu shika.
Omukalelipo gwaFrance ota ti elongelokumwe lyoshilongo she naNamibia miinima ya guma opolisi olya tamekele momumvo 2001. Okwa kolekulula ehalo lyaFrance okuyambidhidha oNampol nokudheula aanambelewa yawo.
“Otwa hala okukwatha Namibia a tote po ondungethaneko yokulwitha iikulumuna,” Bossiere ta ti.
Omwedhi gwa zi ko, osheendo shiilyo iyali okuza kondoolopa yedhina Orleans moFrance oshe yile moNamibia okutala nkene tashi vulu okukwatha opolisi yOshilando shaVenduka okuhwepopaleka omuthika gwayo noonkambadhala dhayo okulwitha iikulumuna nomiyonena.
Iizemo yomakonakono gawo oya ulike kutya Opolisi yOshilando shaVenduka oya pumbwa omadheulo gaanambelewa, iiyakulitho yokupungula omauyelele nenge oonzo dhomauyelele taga vulu okumonika nuupu, iilongitho yopautekenika opo yi vule okulonga nondjungu. Omunambelewa mOmbelewa yUukalelipo waFrance, Yann Hwang, ota ti shika kashishi oshikando shotango Namibia naFrance taya konakona oompito dhokutota po ooproholama dhopamuhanga. Ano France ota longele nale kumwe noNampol. Ombelewa yUukalelipo waFrance natango ohayi longo paukumwe noUNICEF mOshikondo shEgameno lyAanona mokugandja egameno netonatelo koomeme naanona mboka haya monithwa iihuna nomahepeko.