Lazarus Hakwaake
EENHANA – Paulus Sion Angombe omupangi keifano ha longele moshipangelo shopaumwene Green Side mEenhana na oye umwe womwaava va pewa eedjapo eshi e lilongela oilonga yoipilangi oule weedula nhatu.
Okwa ti kakele keifano loupangi, oku lilongela oilonga yoipilangi osha kala ondjodi yaye yokounona. Okwa ti oku udite ounwa unene eshi e li umwe womwaava va pita nonande kasha li shipu okutukula efimbo lofikola pamwe noilonga youpangi. Sion okwa kala ta pange ovanhu omutenya yee tayi keetundi komatango nongeenge e li mefudo.
Metumwalaka laye koshivilopito oshitine shendiki loungoba kEenhana okwa popya ta ti, “monghalamwenyo omunhu iho kulu ngeenge oinima ipu, ashike oho kulu nawa ngeenge wa shakeneka omashongo”. Okwa ti momadeulo avo ova pita meefina dihapu do odo da eta opo ve shi pondole nokupita nawa.
Okwa ti ota dimbuluka nawa kutya ope na efimbo limwe mendiki kwa li mu hena ounima voku kelela ondwi ihaye momayulu osho sha nyika oshiponga koundjolowele wovalongwa oshoyo ovalongi. Eshongo limwe ta dimbuluka oleli kutya endiki loungoba ola kala lihe na omuhandjo wovanafikola efimbo lile, ashike paife ove na hewa.
Kovadali Sion ota ti ota pandula ovadali aveshe ava va yambidida ounona wavo efimbo lelihongo pakufuta eenhele dokukala, oku va pa omayele oshoyo omailikano. “Twikileni nokukwafa oshoyo okufila oshiwana oshisho,” osho Sion a ti.
Kovanafikola vakwao okwe va twa omukumo opo va kufe ko elongo lopaungoba ve lipak amo, okwa ti ovakulunhu nava udifwe ko efimano lelongo lopaungoba, elongo lopaungoba kali fi lovadopi ile ava va twa ofikola okati ngaashi ovanhu vahapu ve shi tala. Okwa kunghilila ovalongwa vakwao kutya eemhito doilonga moshilongo shetu nena oda finana, sho osho a twa vakwao omukumo opo va ninge ovaeti po voilonga ponhele yokutala kepangelo li va pe oilonga. “Natu yeni tu ka tote po eengeshefa ndele hatu eta po eemhito doilonga,” osho Sion a lombwela ovapiti.