Victoria Kaapanda
ONGWEDIVA–Omutoolinkundana omukuluntu gwoshifokundaneki Confidente Patience Nyangove okwa hulitha.
Nganyove ngoka a yambukile koshitopolwa shedhina Masvingo moZimbabwe okwa hulitha ongula yEtiyali mOshipangelo mOvenduka. Okwa li e na omimvo 37.
Pethimbo sho a hulitha okwa kala ta longela oshifokundaneki shoConfidente, shoka a longele uule womimvo hetatu.
Uuyelele wa pitithwa komukuluntu gwoshikundaneki shoka Max Hamata otau ti, Nyangove okwa kala e li moombete ethimbo lyuule wiiwike itatu sho a monika e na iiti yanathingo itaa yi longo nawa, nuuwehame mbuka we mu fala sigo omeso.
Hamata momushangwa ngoka a li a shangele kiikundaneki okwa ndjokonona Nyangove onga ependa esindani, omunankondo nomutoolinkunda omwiidhidhimiki.
Nyangove okwa li e na ontseyo yokukundaneka yoomvula 16. Okwa tameke eithano lye lyuutoolinkundana kehangano tali ithanwa AMH Media Holding moZimbabwe. Hamata ta ti, miilonga ye yuutoolinkundana okwa kala a palamenwa komashongo ogendji nokwa li nokuli a kwatwa po omathimbo gamwe ketanga lyegameno moshilongo shooyina moZimbabwe, sigo olwahuguninwa sho a ka tokola opo e ye koNamibia.
“Nyangove onde mu tseya ethimbo ele noonkondo. Otwa longela pamwe tango koshifokundaneki shaTrusco, Informante, omanga inaa landula ndje koConfidente,” Hamata ta ti ngaaka.
Kakele kokulonga onga omutoolinkundana, Patience ngaashi a li a tseyika nawa mokati kaatoolinkundana, kwali ta tsikile neilongo lye koshiputudhilo shopombanda shoUniversity yaNamibia (UNAM), hoka a li momvo gwahuginina, a li ta ilongele oshimpungu shoPublic Management, okumona onkatu yoHonours Degree.
Hamata okwa gwedha po kutya oya kanitha oshingoli mehangano lyawo, nota ya simaneke onkalamwenyo yaNyangove nokutunga shoka a tamekele na shoka e ya thigila.
Nyangove okwa thigi ko okanona ke kokamati kamwe, yina naamwayina-mati yaali.