KATIMA MULILO – Bolyaminzi kwa munzi wa Sabelo mwasilalanda sa Sibbinda, banyazize muyemeli wa bona kuli una ni sialuluti hakutaha kwa kuaba liliba mwasilalo sa bona. Muyemeli wa silalanda sa Sibbinda Ignatius Chunga, unyazizwe kaku kungulela sicaba kwatuko hakutaha kwa kuaba lico zalinanga mwasikiliti. Muyemeli hape unyaziwa kuli nailo yepa siliba kwamunganda wahae kusiya bolyaminzi ba Sabelo, ili baba kulubelwa kuli nebali famukoloko wabane balukela kufumana liliba. Limembala zasicaba bane babilaezi mi nebakupile kusazibwa kabaka la kusaba kuhalifelwa, nebaize neba lemusizwe ki nduna wa munzi kuli munzi wabona nozusizwe famukoloko wabane bana nikufumana liliba.
Sicaba sibulela kuli muyemeli wabona naize munzi wabona nosina mayemo akufumana siliba. “Halu utwisisi kuli muyemeli ulu toyezi ñi, silimo ni silimo lwa kupa kono fa selutalusezwa kuli haluswaneli kufumana. Nailo yepa siliba kwamunganda wahae, mi hape nabeile mwanahae famukoloko. Lusicaba sesili mwamanyando, kono ubata kufiteza kwapili batu bao liliba zabona hali sebeliswi kisicaba,” neku bulezi bolyaminzi. “Mwanahae hana mulaka, kapa munganda cwale ufumana cwañi? Za eza muyemeli lifosahezi, uzwelapili kukungulela linjebwe kwatuko, yena inge aipumanela. Uswanela kulu taluseza kuli utalima mayemo acwañi kuketa babafumana.” Nekupalile kufumana bupaki ku Chunga, kakuli foni yahae yafanoka nesika alabwa hane alizelizwe mwamazazi amabeli. Hape nasika alaba liñusa lene lilumezwi fafoni yahae yafanoka.
– osimasiku@nepc.com.na