Namibiab Studentn Marisi ǂKhâ!nâs ǂGaes (NSFAF) ge ǀgaisa ǁgoaǂuis !nâ hâ, mâtis surudesa maride studentna xu nî hō-oas dis ǀkha hîa nēsi N$2.8 biluns ai mâsa. Nē ǀgapise ǂharo hâ marisa ge !aromas ge, ai!âkam studentn hîa NSFAFs xa marisise ge mâ!gâhe xawe, ǁkhāǁkhāsentoas khao!gâ ǁîn di surudesa maride mātare-oa taman xa ge !aromahe. NSFAFs di ǂNûǁkhaeba ra Danab, Kennedy Kandumeb, nausas nē marisa māǂuis di ǂHanumasa ra mî, nē maris ǁkhawa nî ǂgâxa-oa tsî nau studentna ǁnāpa xu nî huihe ti, xawes ge nēsa ī tama ge ī. Kurigu !oedes ge NSFAFsa ra dītsâ nē mariden ai!âkam studentna nî mātare-oasa xawe !gâiba sī!nâ tama hâ, nē student ǁae tama is tsâsiba ra ǁgau amaga. ǀNîn nē surudega mâi hân ge ǀaedī-aon tsî !kharaga sîsenn ǀgapise ra mātarebahen !nâ ra sîsen khoena, xawe mātare-oa ǂgao tamana,” tib ge Kandumeba ge mî. Nē mâǂoa hâ maridi studentna ôas tsî maride ǀhaoǀhaos !aromas ge NSFAFsa 2018ǁî kurib !nâ ǁnâuguxoaǁguiba Tribesmen/NICS ǀkha !hûǁaresa ge tsoatsoa, xawes ge nēs tsîna sîsenǂuiba ūhâ tama i tsî ge ǀamǀamhe. ǁKhā kurib di Taraǁkhumuǁkhâb 18, ais ge surudesa marina ǀhaoǀhaos !ereamsa NSFAFs berosa xu nî dīhese ge ǁnā-oa. 2018 !nâs ge NSFAFsa N$14.7 miljunsa ge Tribesmensa ge mātare, xawes ge ǁîsa N$6.8 miljuns ǀguisa ai!âkam studentna xu ge ǀhaoǀhao. Nēs ǀkhas ge NSFAFsa N$7.9 miljunsa ge ǂoa!nâ. NSFAFs ge 2014ǁî kuriba xu N$287 500 ǁkhâkorobe gere mātare, !khōdanas mâǂoa hâ surudega ǀhaoǀhaos dis ase. Kandumeb ra mîsa !oan ge ǁîna a ǀhawe, ai!âkam studentn di xoakhâiba !gû!gâs ǀkha in tarin mātare hâ tsî tarin mātare tamasa ǂanǂui in nē khoena ǁîn di surudega mātare. Sistems ra ǁgausa !oas ge noxopa N$2.8 biljunsa mātaresa tama hâ. Kandumeb ge ǂgaisa ǁnā ai!âkam studentn hîa a ǂan noxopan ǁîn maride mātaretoa tamas ka i o mātaretsoatsoas tsîna dī tamana, ǀgūǀgūsen NSFAFs berodi tawa tsî !khai-i ai tsoatsoa.
Nē maris ge kai huib ase nau Namibiaǁîn hîa marisihuiba ǂhâba hân !aroma ī, tsîts ge satsa mātare tama is ǀkha sats tsîn ge māhe hâ i !ēsa ǁîna ra ǀhana.