!GOMENǁGAMS – ǁAupexa di ge 500 omde !Garo!ās 37 di !â-i ai, Namibiab ǁKhaubas Sîsenaon (NDF) hîa !Gomenǁgams !nâ ra sîsenn !aroma nî omhe, tib ge kai!ā tsî !garo!ā omkhâisens ministeri, Erastus Uutoniba ǂoa ge wekheb Donertaxs ai ge ǂanǂan.
Nē ǂanǂansab ge Uutoniba ge dī, ǁnāpas ge !Gomenǁgams !ā!nāsi ǀawemā!nansa ǂoa ge wekheb Denstaxs ai, 129 513 kaisiba !khōǂgā hâ !âb noxopa ǂhomisa tama !hū!âs dibas nî N$50 ga ǀgui ǀnōǁnâsa metergu ai Power Shield Trading ti ǀon hâ ǂnûiǂgās hîa ǁKhaubas ǀHûs ǂGaes !naka ra ǁnās ai nî ǁamaxū ti hâ aoǁguiba a dīs khao!gâ. Power Shields ge ǀnai !hū!â-i !aroma ǂganamsensa ge dī hâ i, îs NDFs ǁanina omna omba. Nē ǂnûiǂgās ge ǁaupexa N$6.4 miljun marisa nî ūǂui.
“Sida ge ra ǁawoǁawo in ǁkhaubas ǁanin tsîna omna ǀūǀkhābasen ǁkhā. Nēsa da ge ǀnai ǀAeǁgams tsî ǀnî !ādi !nâ ge dī tsî nēsi !Gomenǁgams ǁga go !oa,” tib ge Uutoniba ge mî. Ai!âb ge ministera ge mî, ǂhanub ra ǁguiǂgāsensa, in !hūǁîna ǁîn ǁkhāsib !nâ hâ omna hōbasen tsî ǁnās !aroma hoa ǁgoaǂuidi ai ra sîsen, !hū!â-e hōbasens tsî om-e ombasens hoa Namibiaǁîn xa nî ǁkhābahesa.”Tita ge nēpa khoen xa ǁnūhe hâse go hā.
Sida ge ra mû ǂgao mâtis maris hîa !hū!âde mās tsî !hūde ǂhomis !aroma ǂnûiǂuihe hâsa sîsenūhe hâsa. ǁAwoǁawo hâse ǁkhaubas ǁanin tsîn mâti ra domdoresa,’ tib ge ge mî. Uutonib ra mîsa !oas ge !Garo!ās 37 di !â-e ǁamasa a !gâi mîǁgui, ǁîs ǀgūse Rooikop ǁkhaubas !khaib tawa ǁgoe tsî supuse hoan xa a sīhe ǁkhā amaga. !Garo!ās 37 ge 30 000 !hū!âdi ǁkhāsiba ūhâs ge nē kurib !nâ Kabinets xa ge !khō!gâhe ǁaupexa di 800 omaride ǁnāpa nî hâ!khaimāhese.
Nē garu-a sîsenni di !âsen ge ǁaupexa 400 ǁanǂgāsaben !Gomenǁgams di Twaloloka ǂnaumaiǁganǁguib din hîa ge ǂhuwib !nâ-ū ǁan!nâ!khain âna a ǂoa!nân tsî nau 235 omaridi khoen hîa ge ǁîn tsîna !kharaga ǂhuwigu !nâ-ū a omon tsîn hoana ǁnāpa nî ǁan!khaimāhe.