Ehangano “lyoSilverLife Wellness Bootcamp” olye ya po noprogalama yokuyambidhidha nokupukulula aanona mboka ya kanitha omikalo osho wo ya landula oondjila dha puka.

Oprogalama ndjoka ya totwa po komugundjuka gwedhina Daniel Nghihepa oya nuninwa aanona okuza pomimvo omugoyi, sigo aagundjuka yoomvula omi- 20, oku ya pa omahungomwenyo osho wo oku ya pukulula ya kale melandulathano.

Oosikola dhehungomwenyo dhoSilverLife ohadhi ningwa moondoolopa ndatu, Oshikango, Okongo osho woWalvis Bay.

Nghihepa okwa ti oprogalama ndjoka okwe ya po nayo sho a ndhidhilike kutya aakuluntu oyendji oya kala noku nyenyeta kutya oya kanitha oonkondo okupukulula aanona yawo oshoka itaya uvuko omolwomatompelo ga yooloka.

“Aanona yamwe momagumbo oye li mo ya kanitha omikalo, ya lamba oondjila dhekano omanga yamwe ya kanitha ehalo moosikola. Oprogalama ndjika oyi lile po okugalulila aanona mondjila yu ukilila nokuhulitha po ayihe yaa li mondjila,” ta fatulula ngaaka.

Okwa popi kutya oyendji ya hiti oosikola dhawo dhepukululo oya lundulula omikalo nokweekelahi oombepo dha nyata, oyendji oya shuna mondjila moka ye na okukala noya dhimbulula kutya oonkalamwenyo dhawo okwa li ye dhi tula moshiponga.

“Aakuluntu oyendji oye tu galukila niizemo iiwanawa, taya popi kutya oya mono omalunduluko konima aanona ya hiti osikola ndjika, shoka tashi tu pe wo omukumo kutya nani shoka tatu longo otashi eta wo iiyimati iiwanawa,” ta popi ngaaka.

Daniel okwa fatulula wo kutya oprogalama yawo ihayi gandja omadhewo omadhigu, ihe ohayi longitha omikalo dhilwe okulundulula omadhiladhilo gaagundjuka.

Okwa popi wo kutya nonando taya yambidhidha ngaaka, oya taalela wo omashongo goshimaliwa osho wo iiyakulwa yilwe.

“Elalakano okwiindjipaleka ya thike poosikola miitopolwa ayihe, ihe otaya pumbwa omayambidhidho,” ta fatulula ngaaka.

Ta ti oprogalama ndjika kayi shi ashike osikola yowala, ihe otayi dhana onkandangala moonkalamwenyo dhoyendji.

Theresia Shihepo okwa ti okwa li a fala ko okanona ke, ihe okwa mono elunduluko enene muko.

“Onda pandula osikola yehungomwenyo ndjika oshoka oya galula omunona gwandje mondjila ya puka moka a li, nena omulumentu gwelandulathano,” ta pandula ngaaka.

Ufemia Kamati, okwa ti okanona ke komimvo omu-16 hoka ka hiti osikola mOshikango oka kala ke li mevundakano, ihe nena oke li nawa.

“Ope na eyooloko enene konima omumati gwandje a hiti kosikola hoka, oyindji a li ha ningi ya puka nena okwe yi tula po, nangame ohandi kala nda kumwa, ashike onda pandula,” ta popi ngaaka.

Okwa kumagidha aakuluntu aakwawo ye na uupyakadhi waanona itaaya uvu ko kutya oku na oshipangelo shoka tashi kandula po uupyakadhi mboka.

-vkaapanda@nepc.com.na