ONDANGWA – Omukulupe weedula omi-62, Selma Daniel okwa dja mo modolongo konima eshi e lifutila mo noshimaliwa sho-N$5 000, eshi kwa li a kwatwa po shaashi a kala nokuhepeka omunailonga waye womeumbo. 

Omukulupe ou modolongo okwa dja mo omwedi wa dja ko konima eshi a ninga eindilo lokulifutila mo. 

Okwa li a kwatwa po konima eshi a hepeka omunailonga waye womeumbo, okakadona keedula omu-16, oko ke li omukwashiwana waAngola. 

Oshiningwanima osha ningwa komukunda Oshiyagaya moshitukulwa shaShikoto neudo momwedi Marsa. 

Omafiku 16 Marsa, Daniel okwa li a holoka momhangu yaNdangwa lwoshikando shotete. 

Ka li a pewa omhito yokulifutila mo modolongo molwomakonakono kwa li taa ningwa pefimbo opo. 

Okwa lombwelwa komhangu opo a kale te lilopota koshitaashi shopolifi kOmuntele lumwe moshivike keshe. 

Oshikumungu shokakadona ka hapekwa okwa li sha kumwifa oshiwana. 

Opolifi oya hokolola tai ti okakadona aka oke uya moNamibia taka kongo oilonga yomomaumbo. 

Nakuninga oshihakanwa okwa mona oilonga meumbo lomukupe ou. 

Opolifi oya hokolola tai ti omukulupe ou okwa udanekela okakadona aka kutya ote ka futu ondjabi komwedi yoN$500 ashike ine ka futa okudja muNovemba omudo wa dja ko. 

Nakuninga oshihakanwa okwa kala a tambulilwa moshipangelo shaNandjokwe ta mono epango lopaunamiti ashike paife okwa shuna koshilongo shavo. 

Omukulupe ou okwa kwatwa po konima eshi ovashiinda shaye va kwata okakadona aka okavidio ndele tave ka tula komalungula. 

Konima eshi oshiwana sha mona okavidio komalungula osha lopotela opolifi naashi osha eta omukulupe a kwatwe po. Oshiwana eshi sha mona okavidio komalungula shokakadona aka ta hokolola nghene taka mono oixuna osha kumwifa kehokololo eli shaashi otali etifa olukeno. 

Pefimbo ta pulwa kovashiinda shaye mokavidio, nakuninga oshihakanwa okwa hokolola ta ti okwa kala ha longo mepya okudja ongula fiyo okomatango. 

“Kanda li handi futwa ondjabi yange. Kakwa li handi pewa oikulya,” ta ti. 

Okwa hokolola ta ti ngeenge ta limi mepya oha dengwa shaashi ka kwa li a pitikwa okukala ofika. 

Okwa ti okwa li ha nangala moshipaleki pedu pehe na etalashe. 

-fhamalwa@nepc.com.na