Omulumemhu weedula 38 okwa kwatwa po oshivike shadja ko konima eshi vati a hangika nepangwe a holekwa mololi yaye, koshi yoshipundi.
Oshiningwanima osha ningwa oshivike sha djako komukunda Otjindakui moshitukulwa shaKunene efimbo lokomatango.
Omukulunhu koshikondo shokukonakona oimbuluma mopolifi moshitukulwa shaKunene omupedu Commissioner Paavo Iiyambo okwa hokolola ta ti epangwe olo ola monika pefimbo opolifi kwa li tai ningi oshikonga shokukandeka oimbuluma.
Otaku hokololwa kutya omapangwe okwa hangika koshi oshipundi a tonyenwa meembapila.
Omufekelwa ota holoka momhangu nota pangulilwa oshibofa shoku humbata oingangamwifi.
Opolifi oya kumaida oshiwana opo shi kale alushe tashi longele kumwe nopolifi okulopota ovanhu tava landifa oingangamwifi shaashi ina i pitikilwa mo moshilongo.
Opolifi oya ti vanhu paife ohava kala tave li dipayafana konima ngeenge va nwa omapangwe shaashi epangwe oha li piyaneke ouluvi womunhu opo a kale a kwatwa komhepo yokulonga oimbuluma.
Oshiningwanima shikwao, omulumenhu weedula 39 okwa kwatwa po konima eshi vati a vaka po ovili yomeva yopomba kofaalama yomuhona waye kOutjo.
Otaku hokololwa kutya omulumenhu ou okwa ka holeka ovili yomeva keumbo la kaume kaye. Okaume kaye weedula 41 naye okwa kwatwa po nomakonakono opolifi otaa twikile.