WINDHOEK – Omutondoki dingi omukulu moNamibia Frankie Fredericks okwe limonena odjapo yopombada momaudano a yooloka Etitano, kedjalo lomanguwo ko-NUST.
Fredericks pefimbo a li ta pewa odjapo yaye yakula yo-PHD, okwa tumbula kutya yee nande a pendjelwa moudano wokutondoka, okwa twikila elihongo moshikondo shoumaudo opo a twe ovanyasha omukumo.
“Onda dilikika kutya ovanyasha vahapu ove na oitalendi ya yooloka tai dulu oku va kufa koxulo yehonga ashike ove li momaumbo va mwena. Onde lihonga noudiinini ndi va twe omukumo wokushikula ondjila yange yelihongo oshoyo yoshitalendi shange, shaashi onde lineekela otai tu omunhu omukumo,” Fredericks ta ti.
Fredericks okwa tumbula yoo kutya elitulemo laye lomomaudano a yooloka olo li li onga yoo oshitalendi shaye shakula, oshe mu pefa eembadi doisiliveli da fika punhee koBarcelona mo1992 oshoyo Atlanta mo1996.
Okwa twikila kutya yee okwa kulila momalukanda aKatutura, omo a tekulwa kuina nova li tava mono oixuna. Okwa ti onghalo yavo naina natango oye mu undula opo e lihonge noudiinini a dule okukufa ina koshi.
Fredericks okwa ti natango oku na yoo ehangano laye olo li lipo ta li vatele ovanamibia momikalo dihapu fiyo onena ngaaashi ovakwanaluhepo, okufutila ovanhu eefikola oshoyo okutwa ava ve na ohokwe yomaudano a yooloka omukumo.
Pefimbo loshivilo shedjaleko lomanguwo Fredericks okwa kufa yoo omhito a pandule ominista youmadano Agnes Tjongarero oo a li e mu findikila kedjalo lenguwo laye.
“Tjongarero okwa kala omutulilemo, oshoyo omuyandjimayele wange akula okudja petameko lelihongo lange fiyo onena. Ondi udite yoo etumba eshi a findikila nge kedjalo lenguwo lange shaashi ngeenge nde mu tala onda fa ashike handi tale meme a dala nge,” Fredricks ta ti.