Elelelo lyondoolopa Ondangwa ohela olya kutha ko oongaku sho lya opaleke ondoolopa ayihe koonono.
Pethimbo lyoshikonga shika omugandji gomauyelele gondoolopa ndjoka Petrina Shitalangago- Mutikisha, okwa li a kunkilile nomuthindo kutya ekako oshinima oshiwinayi onkene uuyogoki nawu kale oshinima shotango.
Ta ti, eopaleko ndyoka hali ningwa omumvo kehe, olya li lya longekidhwa nelalakano lyokukaleka ondoolopa ya yela.
“Uuyogoki owa simana onkene oshigwana oshi na okukala tashi opaleke omalukalwa gasho oshowo omidhingoloko dhasho opo ku yandwe omikithi tadhi vulu okupitila moongaga,” ta popi ngaaka.
Ta kumagidha oshigwana shaNdangwa kutya, nashi kale sha tula uuyogoki komeho.
“Ondi inekela kutya kehe gumwe okwa hala ondooloopa ndjika yi hume komeho, pamukalo gwomayakulo ga yooloka, ihe shoka otashi ningwa ashike uuna ondoolopa ya yela, oshoka kape na ngoka ta hala okweeta ehumokomeho mehala lya gagala,” ta ti ngaaka.
Shitalangaho-Mutikisha okwa kumagidha oshigwana kutya, esiku ndyoka inali kala olyo tali opalekitha ondoolopa yaNdangwa, ihe nashi kale onkalondjigilile noshiholelwa shokwoopaleka aluhe.
Ta gwedha po ta ti, okwa nyanyukilwa aakalimo yomOndangwa sho ya kutha ombinga okwoopaleka ondoolopa yawo.
“Ondoolopa yetu oyo yimwe yomoondoolopa dhomonooli ya yela, onkene otandi kumagidha aakalimo ya tsikile nomayihumbato gokukaleka po uuyogoki,” ta kumagidha ngaaka.
Shitalangaho-Mutikisha okwa ti natango okwa li ya ningi omathigathano nomayinyanyudho galwe, ngoka kwa li ga ningwa pokati komahangano nomandiki ga yooloka oshowo oosikola dhomOndangwa.
Ta popi ta ti, aantu ya thika 2 000 oya li ya kutha ombinga miinyangandhalwa moka.
Elelo lyondoolopa yaNdangwa okwa li lya yambindhindhwa komahangano ngaashi Olthaver and List Group of Companies, FNB, Standard bank, Ondangwa Private Hospital, O’save Mini Market, Elcin Deacon Department, Cymot, FreshCo, Plastic Packaging, Genesis Auto Repairs, Punyu Group of Companies, Huhu City, Dharani Mini Market, Pala Trading, oshowo J Kuumeketu Trading.
vkaapanda@nepc.com.na