Nonando epangelo olyi na omahala ge li gahetatu gokuweedhilila aanona naamboka ya taalela onkalo ondhigu moshilongo, omahala ngoka oga taalela omashongo ga yooloka.
Omahala ngoka oga endhilila Aanamibia ye li 26 oshilongo ashihe.
Ndhoka okwa li dha popiwa kuminista gwiinima ya pamba uukashikekookantu Doreen Sioka, momushangwa gwa pitithwa esiku lyuundjolowelele wopamadhiladhilo.
“Nonando kwa kala taku lopotwa kutya oosenda ndhoka itadhi longo, kashi shi shoshili, ihe oku na ashike omashongo ngaashi gaaniilonga ngoka taga ka kandulwa po muule wethimbo efupi,” minista okwa li a yamukula ngaaka momushangwa.
Okwa ti, omahala ngoka oga endhilila aanona ye li 14 oshowo aakuluntu 12, mboka ya li ya tothwa mo ya taalela onkalo ondhigu, noitaya vulu okwiipalutha kuyo yene.
Ta gwedha po ta ti, aantu mboka ya pewa omalukalwa kepangelo ohaya gwanithilwa oompumbwe dhakehe esiku kepangelo.
“Okukandula po omaupyakadhi gomahepeko ga yooloka oshinima shaa na ehuulilo. Epangelo onkene tali tsikile okuyambidhidha ekandulepo lyomaupyakadhi gomahepeko,” ta ti ngaaka.
Ta ti, ooproyeka dhopaumwene hadhi gandja omalukalwa oshowo okusiloshimpwiyu aantu ya taalela oonkalo oondhigu moshilongo oya yambidhidhwa kepangelo noshimaliwa shi thike poomiliona N$2.
Sha ikwatelela kolopota yopolisi, oshilongo osha ndhindhilike iipotha ya pita 5 300 yomahepeko, nuunene okwa konekwa taga ningilwa oomeme naanona.
Omuhungimwenyo gwomOshakati Selma Nathanael, ngoka ha hungo aantu oomwenyo momalukanda nokupwiikina omawupyakadhi oshowo omahepeko gomomagumbo, moonkundathano naKundana okwa ti aantu oyendji oya taalela omahepeko ihe oya mwena.
“Oyendji otaya lilile momitima, sho osho shoka aantu taya si omaso gombaadhilila nenge taya ikutha oomwenyo oshoka oye na uumbanda okuholola nokupopya omawupyakadhi ya taalela,” Nathanael ta fatulula ngaaka.
Ta ti, okwa tsakaneka aantu oyendji ya taalela omahepeko, iha oya tinda okuga eta puuyelele oshoka anuwa oya tila oshoka oya mbandamekwa kwaamboka taye ya hepeke.
“Oomeme yamwe oye li momagumbo, ihe otaya dhengwa uusiku awuhe kaaholike yawo, kaape na nando etompelo limwe. Aanona yamwe otaya thiminikilwa momilalo koohe, ihe oya lombwelwa kutya ngele oye shi popi otaya dhipagwa,” ta popi ngaaka.
Ta kumagidha ta ti, oshigwana nashi uve ko kutya oshili moshilongo sha manguluka uuna wa taalela uupyakadhi wu li ngaaka, thika mbala poombelewa dhookansela kehe oshoka ope na aahungimwenyo, mboka taya vulu okukwathela mbala.
“Aantu mboka otaye mu mbandameke ashike, ihe kaye na oonkondo ye vule ooveta dhoshilongo shika, thikameni nena e tamu popi mo omawupyakadhi mwa taalela, omwa gamenwa,” ta kumagidha ngaaka.
vkaapanda@nepc.com.na