!GOMENǁGAMS – Daogu ǂGaeǂguis (RA) ge ǁkhawa daob !gâi!gâi!nâs tendersa Zhong Meib Engineering !Nansa go mā. Nē ǂnûiǂgās hîa Chinese !hūǁîb xa a ǀhonkhoe-aihes ge haka !hūǁî kontraktern ǀkha nē tenders !nâ hâ tsî 30 kilometergu !nūsiba !khōǂgā hâ daoba !Ūsa!khōs tsî ǂGaribeb hâra ǁaegu N$343 miljuns ai !goaxa ǁkhâba xu nî sîsentsoatsoa. Nē projeks ge marisise KfW Omkhâisens Marisâuǂgaes xa ǂhanub ǀkhuwimaris !nâ-ū ra mâbahe. !Ūsa!khōs tsî ǂGaribeb daob ge ǁîb tsîna a !â Trans-Kalahari Kai Daob(B2) diba tsî !hū!nāsise tsî !auga!hūsise ǂhâǂhâsa !âsa ra ǀhuru, ǁîb ra !Gomenǁgams di huri-ammi !naoǁhôas ǀkha !hû-ǁare amaga.Nēb ge ǁkhāti gui daob hîa hoa daogu Namibiab digu xa !nāsase a ǀhawe aiheba, ǂgâxa-ūs tsî ǂoa-ūs xūn dis sao ra !hūgu dis !aroma: Botswanab, Zambiab tsî Malawib din hîa tsēkorobe !Gomenǁgamsa xu ra !nari-ūhen !aroma. Oa ge wekheb Fraitaxs ais ge Daogu ǂGaeǂguisa ǂhôamāǂui-i !nâ a mî ases ge ǁnā haka !hūǁî kontraktern di ǂnûiǂgāde mâs hoasa -îs di ǀō-aisa !ereamxasiga tenders !nâ a ǁguiǂuisa khami a māsa. Investment Holdings ǂnûiǂgās ge !gauna sîsenga nî dī, Tangeni OM ǂHarugub nî drainsîsenga dīse, West ǂHarugub nî daob aib ǁawosasiba dī tsîb Alugodhi ǂHaruguba gabiondi tsî guardrailde nî dīse.ǀHaob ai di ge nē kontrakdi ǁkhāsiba N$63 miljuns ai ra sī hîa hoa!nâ-aixase 25.18%gu kontraks disa ra dīǂuise.
!Gâi!gâi!nâs tsî ǂgaoǀkhāsa !harib ai nē daoba sī-ūs ge a !â 2+1 laingu Kai-khaes-ǂGaribeb daob digu diba hîa Tsoaxubams ǁga !kharu!kharuhe tsî ǀams ai Dr Hifikepunye Pohamba daob hîa Dune 7 !gâb ai ra !kharub ǀkha nî ǀamse. Daogu ǂGaeǂguis (RA) di Sîsenǂuira Mâisab, Conrad Lutombib ge sao rase gere mîse ra ǁgaehe, nē projeks di sîsenǁaeb !nân ǁaupexa 500 sîsenga nî ǂnuwihesa. “Daob nēb kurus ge nē kurib Taraǁkhumuǁkhâb !nâ nî sîsentsoatsoase a ǀaweǁguisa tsî ǂâi!nâ-guise dītoasa âba 18 ǁkhâga a māsa. Nē ǁaeb !nâs ge Rasa nî ǁawoǁawo sîsenxasigu ǂgaoǀkhādi tsî ǁnâugub !oagu ra dīhesa tsîn !nari-aon tsî ǁanǂgāsaben tsî !ao-am hâ khoena kaise ǂhanihe tidesa,” tib ge ge mî. Lutombib ge ai!â ge mî, !gâi!gâxa ǂharuguba nē tenders !aroma ǁhûis ge ǁkhowa-amsa !Auga!hūsi ǀNûgus (OIB) di !gûǁnâgauba a sao tsî ǀHûhâsib ǁAmaǂgans ǂHanumās tsî KfW di ǁgaragu !naka a dīhesa. Zhong Meib ge 2015ǁî kuriba xu kai daogu !gâi!gâi!nâdi tsî daokurudi projekdi !nâ a !â hîa N$1 biljun projeks, ǀAeǁgams-Hosea Kutako Anikuniǂgās di 21 km daob tsîna !khōǂgā hâse. ǁKhātis ge nē ǂnûiǂgāsa 2016ǁî kurib !nâs tsîna N$755 miljuns tenders age hō hâ I, Tsoaxubams-Henties Bays-Uis daob !aroma.
Dī-ūnus… Daob !Ūsa!khōs !nâ ra dī-unuheb.