Umwe womovashikingalo dingi vaNamibia Monica Pineas oo a shivika nawa mowela ongaTop Cheri, oku li ta denge ondjibo ye ta kalele po Namibia koshikondo shomalihafifo ko Venezuela.

Etitano la dja ko, Top Cheri okwa li a shiivwa a ka mwenyeke ovakwashiwana vaVenezuela koshitufi osho hashi ifanwa Festival Cultural  con los pueblos de Africa.

Okwa li ko a djala oikutu ya kalela po omufyuululwakalo wOshiwambo.

Top Cheri okwa ti komesho yovanhu  okwa ya ko a djala omufyuululwakalo wavo, ye e na epandela loshilongo lavo peke, nelalakano a tandavelife omhepo youkumwe, ohole nelongelokumwe olo hali kala la pumba molwaashi ovanhu ove li li kokule.  “Osha pumba okutandavelifa omhepo you kumwe pokati koilongo okudilila momukalo u li ngaha,” ta ti. Okwa ti luhapu ngeenge oilongo wa hange ya hangana ngaha, unene omomukalo ashike wopambelewa osho yo moinakuwanifa yomitumba dopashiwana. 

“Onda hala ngeno shi kale omukalondjiikile moilongo ya yooloka, opo ashike hatu dulu okukala hatu tandavelifa ondjibo osho yo oitelendi yetu koilongo yopopepi nokokule,” ta ti. 

Okwa twikila kutya ovakalimo va Venezuela ova kala va fila eendjibo doludi eli enota . 

“Vahapu kave udite elaka eli hatu imbi, ashike eshi twa waimina nospana yange hatu shi denge moshili, vahapu ova kufa mo eengodi davo diva,” ta ti.  Top Cheri okwa ti shito oha kala a tila okushika eengalo kondje yoshilongo, shaashi ohapa kala pe na eyooloko ngeenge ta shiki eengalo daye meni loshilongo. 

“Keumbo ovanhu ove sh i nale eengalo dange dihapu, ame noho ihandi kala nda tila shaashi onde va mangulukila. Ashike ngeenge tashi ya kondje yoshilongo, kanda li ndi shi ngeenge otashi ka kala shipu ngaashi ngaha,” ta yelifa. 

Okwa ti ovanhu ova li tava shikula lela. Vo vali ova shambulwa neenghono. 

Okwa weda po yo kutya okwa hala okukala ta talele po oilongo paife, shaashi mboli oshiima oshiwa. Okwa twa oombushe vaye moilonga omukumo vaha pilamene eemhito doku ka shika eengaalo davo kondje yoilongo shaashi ngaho otava patale oitalendi yavo pondje. 

-psiririka@nepc.com.na