Aalumentu oya li ya dhana onkandangala miidhano yopamuthigululwakalo ya yooloka sho ya li yu ulike uunkulungu wawo.

Omihoko dha yooloka okwa li dha dhana iidhano yopamuthigulilwakalo, ngaashi Aaherero, Aayelele osho wo Aawambo.

Omulumentu gwomuyelele Jason Auob okwa ti iidhano kayi na omulumentu nenge omukiintu oshoka elalakano okusimaneka omuthigululwakalo osho wo okutuma etumwalaka.

“Onda ilonga oshindji mesiku muka. Atuhe Aanamibia, tu na omihoko dhi na omithigululwakalo dha yooloka,” ta hokolola.

Ta popi ta ti, okwa tseya wo kutya omihoko odhi na iikulya yopamuthigululwakalo yomihoko ngaashi Aakaprivi ya simaneka ohi yoZambezi bream, Aakavango mboka ya simaneka omutete osho wo Aaherero mboka ya simaneka omaere osho wo onyama.  Ta ti, okwa tseya wo natango shoka sha pitikwa nenge sha indikwa momihoko dha yooloka, ano mbyoka ya talika ko ongiipwe nenge iidhila.

Auob okwa lombwele Kundana ta ti, esiku ndyoka oya tyapula nawa oshituthi shomagongo , nokwa ilonga mo oshindji. 

Victor Mutota ngoka ha dhana iidhano yOshiwambo okwa ti, oya li ya fatululilwa kutya omuthigululwakalo ogwa simana nogu na okusimanekwa sigo aluhe.

“Otwa longwa kutya omuthigululwakalo ogwa zi nale nogu na okusimanekwa sigo aluhe oshoka anuwa oshinima sha adhika ko nale, go kagu na okudhinwa,” ta hokolola.

Ta ti, oya li ya fatululilwa kutya omuthigululwakalo ogo omaukwatya  gomihoko dhontumba, gwi ikwatelela kiidhano, kelaka, eitaalo, omayihumbato, iikulya, omizalo, iiyimbo nosho tuu.

Mutota ta ti, okwa ilongo mo wo kutya aantu oye na okusimanekathana osho wo  okutaamba uukwatya wooyakwawo. 

“Oyendji oya kanitha eitaalo lyomuthigululwaka omolwa ya lamba shoka taya longwa kaakwiilongo nenge taya landula omikalo dhawo,” ta popi ngaaka. 

Namibia omuyamba pamuthigululwakalo, ngoka gu na okusimanekwa nokulandulwa komihoko adhihe.

-vkaapanda@nepc.com.na