OTJIWARONGOS – Sentral ǀAwas ǀKharisi !Nanǀgaib Mā!nans (Central North Regional Electricity Distributor ) ge ǂoa ge wekheb Donertaxs ai ge ǂanǂan, ǁîs !nanǀgaib ge 8%gu ǀkha 1 ǂKhoesaob 2023 disa xu ǂharo !khaisa.
Fessor Mbangob nē ǂnûiǂgās di Sîsenǂuira Mâisab (CEO) ge nē ǂanǂansa ǂhaitsi ǂhôamāǂui-i !nâ Otjiwarongos !nâ ge dī. Mbangob gere ǁgui!ā !khais ge Cenoreds hîa sao ra ǀkhariga, ǂgaiǀons ai Omahekeb, Otjozondjupab, Kuneneb tsî ǀnî !âb Oshikotob dib tsîna !nanǀgaiba ra mās ge ǂganamsensa ge dī, !nanǀgaib ǂnamipe nî hâ ǂganǀgaugu ǀgapiǀgapidi !aroma tsîs ge !Nanǀgaib Kō!gâs ǀAwemā!nansa nē ǂganamsensa ge !khō!gâ. ǁÎb gere mîsa !oas ge nē ǀgapiǀgapide ge a !aromasa a Nampower hîa ǁîs tsîna !nanǀgaib ǂganǀgauga nē kurib !Khaitsâb !nâ ge a ǀarosa. Nampowers ge ǁîs !hū!nāsise kai ǀnōb !nâ ra !nanǀgaiba ǀkharisi !nanǀgaigu ǂnûiǂgāde ǁamaxū-ai ǂnûiǂgāsa.
ǁNā-amagas ge Nampowers ra dī ǀgapiǀgapisa ǁîna xu ra ǁama ǂnûiǂgādi, aiǁgause Cenoreds khami idi di ǂganǀgauga ra tsâǀkhā.
“Nēs xa ra !aromaheses ge sida di ǂnûiǂgās di 7.6%gu di ǀgapiǀgapis !nanǀgaib !nâsa ǁnā khoen hîa sîsenūn rase !nanǀgaiba ǁgâudi tawa sîsenūs ase ra ǁamana nî tsâǀkhā, ǁîn nēsi N$2.61 ǀgui units !aroma nî mātare amaga, ai!ân goro mātare N$2.31 khao!gâ,” tib ge Mbangoba ge mî.
Mbangob ge ai!â gere ǁgui!ā, ǁnā khoen hîa hoa!nâ-aixase tamas ka i o ǂharugub di !âb !nanǀgaib !nâ ra ǁnān ge nēsi N$4.45 ǀgui units ai nî mātare, ǂguron gere mātare ǀgui units ai N$4.28 ǀkha i nî ǀgoweǀnōhes karao. !garo!ā ǀhonkhoen ge nēsi N$5.60 ǀgui units ai nî mātare ǂguron go N$5.09 units ai goro mātare hîa. Mbangob ra mîsa !oats ge N$100 di !nanǀgaiba xu ǁgâus tawa sîsenūs !âb !nâ 35 unitde nî !khō!oa, ǁnāpats ge ai!â 40 unitde N$100 xu gere hō hîa. ǂHarugub !âb di sîsenū-aon ge N$100 xu 20 unitde nî hō, ǂguron ge 22 unitde gere !khō!oa hîa. ǂGari-aon N$100 ai 17 unitde nî !khō!oa nî ǀgam unitra ǀkha ǂguron goro !khō!oa 19 unitde xu nî ǀorosa. – Nampa