Ounona voumati vavali ova tambulilwa moshipangelo shaKongo konima eshi va monifwa nokuxwikwa keengodi dolusheno pefimbo kwa li tava lifa oikombo.
Oshiningwanima osha ningwa oshivike sha dja ko efimbo lomutenya komukunda Oshakati-shaKatelenga mOhangwena.
Okamatyona kamwe oke na omido 11 omanga kamwe oke na omido 14.
Kansela woshikandjohoololo shaKongo Efraim Shipindo okwa ti ounona ove li monghalo i li xwepo ashike ova pushuka komalutu molwaashi ova pya. Okwa hokolola ta ti oumatyona ava ova li va londa keengodi dolusheno tava danauka.
Onghee naashi osha eta opo va xwikwe kolusheno ndele tave li denge po.
Ove lituwa kovakwashiwana va hangika tava ende pondjila apa ningilwa oshiningwanima.
Shipindo okwa kumaida ovadali novahongifikola opo va kale tava yandje ehongo kounona vaha danene olusheno molwaashi olusheno ola nyika oshiponga.
“Osha fimana opo tu yandje ehongo kounona nomomikunda opo ku kelelwe oiponga yoludi eli. Otwa lopotela yoo vali ombelewa yehangano lokuyandjeneka olusheno yoNored kombinga yoshikumungu eshi nokukundafana nghene tu na okukelela oiponga,” Shipindo ta ti.
Lwopokati opo, Shipindo okwa popya yoo vali kombinga yovakwashiwana tava teya po eemboola domeva momikunda davo.
“Otu na eemboola dihapu ihadi longo vali shaashi da tewa po koshiwana. Ovanhu paife otava kwena enota omanga vamwe ohava ende oshinano shile tava ka teka omeva,” ta ti.
Okwa kumaida oovene vomikunda opo va longele kumwe noshiwana okulopotela ombelewa yaye kombinga yovanhu tava longele eemboola ominyonena.
Omudo wa dja ko pefimbo kwa li ta patulula omboola yomeva koshitukulwa shaMusati, minista wounamapya Calle Schlettwein okwa ti eemboola 94 ihadi longo vali konima eshi da tewa po koshiwana.
Onghee okwa ti omunhu ta longele eemboola ominyonena na lopotwe kopolifi opo a pewe ehandukilo lopaveta molwaashi otava teya po omaliko epangelo.