Olutu lwomukulupe gwomulumentu gomimvo 69, ngoka a ningi ethimbo a kana kofaalama yedhina Groenhuis olwa itsuwa lwa ninga nayi.
Omukuluntu gwopolisi koshikondo shokukonakona iimbuluma moshitopolwa shErongo Erastus Iikuyu okwa ti olutu lwomukulupe ngoka a tseyika nedhina Abert Brockerhoff olwa li lwa adhika Etiyali lyoshiwike shika koKlein Spitzkoppe.
Otaku hokololwa kutya omukulupe ngoka okwa ningi esiku ta kongwa, nolutu lwe olwa adhika lwa yonuka mombuga.
Otaku fekelwa kutya omukulupe nguka okwa kana kegumbo e ta kanene mombuga shoka sha eta a se kenota neloloko.
Kape na ngoka ta fekelwa e na mo olunyala moshiningwanima shoka.
Omakonakono gopolisi otaga tsikile.
Opolisi oya kumagidha oshigwana shi kale aluhe tashi lopota kuyele uuna sha mono omupambele gwawo kaye mu wete opo ku tamekwe olukongo omanga kuyele.
Oya gwedha po kutya naya kale aluhe taya sile aakulupe oshowo aanona oshimpwiyu opo kaya ye kokule nayo, oshoka ethimbo limwe ohaya vulu okukana komagumbo nokutsa mombuga.
-vkaapanda@nepc.com.na