WALVIS BAY – Maikuto nabonahala kubifa Labune viki yefelile kasamulaho bacauli nebakwalile mukwakwa waSam Nujoma kalihola zepeli, banze balaela kuli bazamaisi bababeli baShoprite balundulwe famusebezi, ili baba kulubelwa kuli neba nyandisa Fabiolla Zondjembo, ili taba yene itisize kuli aiponde Labulalu kwa Walvis Bay viki yefelile. Bayahi babafumaneha kwamukulela waliwate neba kopani hamoho nibabeleki baShoprite, mapokola hane balika kutibela undi wanyangela. Bane bayemi fapila sintolo sa Shoprite balaela kuli sintolo sikwalile kufitela bayemeli bababeli balundulwa famusebezi.
Nebanze batabeleza lipina zatukuluho bashimbile siswaniso sa nyandi Zondjembo, yane aipulaile kasamulaho akubulelelwa lipulelo zemaswe. Bacauli neba laela kuli afumane katulo sakata nikuli babeleki babañwi bano eziwa hande, mi neba bulela kuli habana kusuta konji habaka amuhela mañolo akuli bababeli balunduzwi famusebezi.
“Lusaba kuli luka latehelwa misebezi yaluna kasamulaho akuitenga mwakucaula, kono neluna nikuyemela Zondjembo. Lifu lahae halikoni kulibalwa. Kuekeza nabata kuli kaufela luna mayemo aluna kwamusebezi ambweshafale.”
Nebasindeketilwe kimembala wakopano ya NEFF Michael Amushelelo, mi nebaize lifu la Zondjembo lipatulula manyando babeleki mwanaha Namibia batalimana nibona. Amushelelo naize babeleki bamwalintolo, malonda ni ba amuheli bamasheleñi banyanda, kakuli babelekisi babona babata feela kufumana masheleñi. “Balu anya mali mwabupilo bwaluna. Fa sebabata kulubulaya. Kukanga nako yekufa kai inge lubalumelela kueza cwalo? Kono babulela kuli nicaulela lika zesina tuso.” Membala walubasi Sabata Tjirange naize lifu la kezalahae lisinula manyando ababeleki. Jose da Silva, ili mubeleki mwasintolo sa Shoprite na amuhezi liñolo la linonge. “Nikabona kuli liyo fita kwamaofesi alukela,” nabulezi.