Ounona voumati vavali ovo va xwikwa keengodi dolusheno koshikandjohoololo shaKongo ova ninga oule womwedi mishipangelo paife.
Oumatyona ava ova tambulilwa moshipangelo shaKongo konima eshi va monifwa oshiponga osho yo okuxwikwa keengodi dolusheno pefimbo kwa li tava lifa oikombo.
Oshiningwanima osha ningwa muApiilili komukunda Oshakati-shaKatelenga mOhangwena.
Okamatyona kamwe oke na omido 11 omanga kamwe oke na omido 14.
Omukulunhuwiliki wouhaku ta kwafele moshitukulwa shaHangwena, George Jeremia okwa ti ounona ove li monghalo i li xwepo ashike ova pushuka komalutu molwaashi ova pya.
“Natango oumatyona otava twikile okumona epango lopaunamiti,” ta ti.
Otaku hokolola kutya oumatyona ava ova li vaa londa keengodi dolusheno tava danauka.
Naashi osha eta opo va xwikwe kolusheno ndele tave lidenge po.
Ove lituwa kovakwashiwana va hangika tava ende pondjila apa pa ningilwa oshiningwanima.
Kansela woshikandjohoololo shaKongo Efraima Shipindo okwa kumaida
ovadali novahongifikola opo va kale tava yandje ehongo kounona vaha danene olusheno molwaashi olusheno ola nyika oshiponga.
“Osha fimana opo tu yandje ehongo kounona nomomikunda opo ku kelelwe oiponga yoludi eli. Otwa lopotela yoo vali ombelewa yehangano lokuyandjeneka olusheno yoNored kombinga yoshikumungu eshi nokukundafana nghene tu na okukelela oiponga,” Shipindo ta ti.
-fhmalwa@nepc.com.na