Paulina Ndalikokule
Opolisi moshitopolwa shaShana otayi konaakona oshipotha shomulumentu gwomOngwediva ngoka anuwa a kuthwa iimima yondando yi vule N$200 000, mwa kwatelwa elyenge lyondilo lyomayovi N$140 000 ohela mOngwediva.
Omupopiliko omukuluntu gwopolisi moshitopolwa Thomas Aiyambo okwa hokolola kutya omulumentu ngoka anuwa okwa kuthilwa iinima mbyoka posheelo shegumbo lye kolukalwa loBetter mOngwediva.
Okwa hokolola kutya sho omufekelwa a thiki posheelo shegumbo lopotundi 20h00, okwa mono anuwa ohauto yoToyota Corolla yolwaala olutsimine ya thikama konima ye moka mwa zi aalumentu yatatu mboka anuwa ye mu ponokele.
“Otaku hokololwa kutya omufekelwa gumwe anuwa okwa okwa kala a ulika omuyonenwa ombistoli manga yaali yomaafekelwa taya hadha mohauto, ashike inaya mona mo sha, opo nee ya ka kutha omufekelwa omalyenge, olinga noshapi yohauto,” Aiyambo a ti ngaaka.
Okalyenge kokoshikeho oke na ongushu ya thika N$43 000, okalinga oka kotha N$23 000, omanga oshapi yohauto yongushu N$10 000 oya yi naafekelwa sho ya fadhuka po.
Aiyambo ota hokolola kutya aafekelwa mboka inaya kwatwa po natango nomakonakono gopolisi otaga tsikile. Opolisi mOshana otayi konakona woo oshipotha shegumbo lya teywa mEhenye mOshakati mEtitatu sho aafekelwa yaali anuwa ya longitha iilongitho kaayi shiwike ya ye megumbo moka.
Aiyambo okwa ti omufekelwa gumwe okwa umbu ondjembo mombanda okutilitha omuyonenwa, ngoka a gilwe pevi kuumbanda omanga aafekelwa taya hadha megumbo.
“Megumbo aafekelwa oya kutha mo ongodhi, okandjato kiimaliwa nosho woo iikutu ayihe yongushu N$2 500,” a ti.
Momudhingoloko gUuvidhiya, opolisi mOmaandaha oya kwata po omulumentu gumwe osho a adhika nonyama yokamenye kaape na omukanda.
Otaku fekelwa kutya omufekelwa okwa kwata nokwa dhipaga okamenye hoka kaape na omukanda guuthemba wokudhipaga iinamwenyo okuza kuuministeli womidhingoloko.
Aalumentu yaali, oya li wo ya kwatwap o kwEengombe mEtitatu mekwatadhano noshipotha sheyako nedhipago lyondoongi kaayi shi yawo.