Paulina Ndalikokule
Oshipangelo shopaumwene shaMedipark moshikonga shawo shokupulumutha kwa gamenwa osha gandja omayakulo gomathulo nomapupaapupo goshali kaakiintu ye li momategelelo ye vule po200 mEngela mOlyomakaya ga zi ko.
Mo N a m i b i a o mw a ndhindhilikwa omaso ogendji guuhanona wa valwa wu na oshiviha shi li pohi noonkondo, noshikonga shoka sha tamekelwe mo2016 otashi kwathele okumona omaupyakadhi muuhanona go ga kandulwe po manga omukiintu inaa pulumutha. Shika otashi shunitha pevi omaso ngoka.
Dr. Francois Siemefo Kamgang pethimbo lyoshikonga, okwa ti osha simana okusila omategelelo oshisho oshoka otashi hupitha oomwenyo dhaakiintu yi ihumbata naanona yawo.
“Oshikonga shika otwe shi tameka opo tu longe oomeme omikalo dhomondjila opo ya kale nomategelelo ga gamenwa. Pethimbo lyoshikonga shika otatu ka pupa oomeme ye li momategelelo. Ngele otwa tsakaneke uupyakadhi ohatu kambadhala oku wu kandula po opo tu shonopaleke omaupyakadhi pethimbo lyokumona okanona,” ta yelitha ngaaka.
Kamgang ta ti oomvula ndatu dha ka pita MediPark okwa kwathele okutanda oshali aakiintu mboka ya adhika pethimbo lyokupulumutha pethimbo
lyoshikonga.
Ngoloneya gwaHangwena Sebastian Ndeitunga moshipopiwa she, shoka sha leshwa pehala lye, okwa kumagitha aalumentu ya hulithe po okwiipatana nokuningila aakiintu ye li momategelelo omiyonena.
“Itandi tsu kumwe naalumentu mboka ihaya sile oshipwiyu aakiintu ye li momategelelo. Itatu vulu okupopya kombinga yomatelelo ga gamwena omanga tu na aalumentu mboka haya thigi po aakiintu konima ya gandja omategelelo,” Ndeitunga a ti ngaaka.
Ndeitunga okwa indile wo ehulithepo lyokumonena uunona momagumbo, oshoka ohashi tula oomwenyo dhaanona nooyina moshiponga.
“Ohashi kala woo oshidhigu okugandja oonzapo dhomavalo kaanona ya valelwa momagumbo, ashike mboka ya valelwa moshipangelo ohaye dhi mono nuupu,” a ti.
Oshikonga shomvula ndjika osha li kohi yotema: “Ethikopamwe muundjolowele womategelelo, kaape na meme ta thigala po.”
-ndalikokulep@gmail.com